Алина Ждакаева: «Тяса содаф и кельгови эрь уженясь»

Тяниень пингть сидеста сашендови кулендемс сянь колга, што од ломаттне аф эряскодыхть лядондомс эряма республикасонк, а тушендыхть павазонь вешема оцю ошу-коза. Аф тяфтамотнень ёткста тячиень героиняньке, мокшень стирсь Алина Ждакаева. Тонафнеманц шумордамда меле од специалистсь лядсь эряма и покодема Мордовияса и марясы прянц павазукс.
Алина получась высшай образования минцень вузсонк—Н.П.Огарёвонь лемса МГУ-нь филологическяй факультетса. Меля шумордазе бакалавриатть «Педагогическое образование» анокламань направлениять коряс. Тяни сон тонафни магистратураса и тяка пингть лиссь ни работама. Стирсь вяти рузонь кялень и литературань занятият Мордовскяй госуниверситетонь многопрофильнай колледжса.
Шачемас-касомас коре Алина Ждакаевась Торбеева аймаконь Сургодь велеста, кассь лама идень семьяса. Алинать ёт ёмласта мялецоль арамс педагогокс. Но тяфта лиссь, што школать аделамда меле сон поступась васенда Торбеевань мясной и молочнай промышленностень колледжу, а сяльде ни, колледжть шумордамда меле, сась тонафнема университету. Тонафнемань кизотне ётасть апак фатяк кода. И вов тяни Алина Ивановна макссесыне эсь содамошинзон студенттненди. Педагогонь тевсь аф тёждятнень эзда, тяса эряви и кирдемшка, и маштома мушендомс марстонь кяль эрь тонафнить мархта, штоба синь кулхцондольхть, а пачфневи материалсь улель теест интересна. И мокшень стирти тя сафтови. Занятиянза фалу ётнихть лац аноклафста и мялень салазь, сяс и студенттневок, а эздост эрь группаса 25-30 ломань, сашендыхть тяза пара мяльса.
Эряви азомс, Алина Ивановна аф аньцек вяти рузонь кялень и литературань занятият. Сон нинге класснай руководитель омбоце курсонь студенттненди, а тя кафтонь-крдань ответственность.
Од педагогсь виденцясь: Мордовиять эзда шири тумать колга сон афи арьсекшнесь. Тяса, кле, сембось содаф и тонатф, эрь уженясь мала и кельгови.
—Пяк мялезон Саранскяйсь,—азозе Алина.—Сон и мазы, и ару. Ошсь аф оцю, сяс сембось ащи маласа фкя-фкянди, аф сашендови ётафнемс кафтонь част кудста работама и меки пачкотькшнеманкса. А нинге тясот монь ялгане. Группасонк мархтон тонафнесь кеветие ломань, эздост аньцек колмотне тусть лия ошу, лядыхне сембе покоттяма тязк.
А нинге, кода азозе стирсь, Саранскяи сон лядсь сянкса, штоба улемс сяда малакс тядянзонды-алянзонды, сиденяста улендемс ширесост и лезнемс теест. Иван Михайлович и Евгения Дементьевна Ждакаефне трудонь кельги ломатть. Жуватадост—кода оцю фермаса. Мирттне-рьвятне кирнихть тракст, вазнят, букат, тувот… Пересновок аф ёмлатнень эзда. Сяс тевда тяса фалу сатомшка. Мзярда героиняньконь эвондакшни ётка пингоц, сон эстокиге эряскоды Сургоди. Кочкай-пуропты шачема-касома уженястонза эрьгат, а меле од вийса тага кярьмоди кельгома тевонцты.
Ольга Колединова.