Анастасия Бабина: «ВЕЛЕНЬ ЭРЯФСЬ МЯЛЕЗОН, ХУШ И ШАЧЕНЬ-КАСОНЬОЦЮ ОШСА»

Теньгушевскяй райононь Шокша велесь мекольдень кизотнень салсесыне ширде сафнень мяльснон. «Мокшень правдаса» аф весть азонкшнеме, што тяза ётасть эряма ломатть мянь лия региоттнень эзда, тяконь лувксса Казаньцта и Москуста. Фкясь эздост—Анастасия Бабина, кона сась Шокша вели Москуста кафта идензон—Дашать и Костянь мархта. Тя ульсь 2021 кизоня, но куд Анастасия Анатольевна тяса рамась нинге 2019 кизоня. Шокшаса лиссь рьвакс, нинге кафксть арась тядякс. Мирденц мархта кирдихть жуватат, касфнихть перень сёрот, модамарьхть.
Анастасия Анатольевна шачсь-кассь Москуса. Школать шумордамдонза меле тонафнесь педагогическяй колледжса. Сяльде лиссь рьвакс, семьяса шачсь стирня. Аф ваномок шабать улеманц лангс, од тядясь ламос ашезь аще тевфтома, а лиссь работама. Валонзон коряс, трудовой стажец ушедсь кемготува кизоса. Пингонь ётазь шачсь цёранясна Костя. Анастасия Анатольевнань семьянь эряфоц ашезь ладяв, васенце мирденц мархта савсь явомс.
Пингонь ётазь эряфонь кись Анастасия Анатольевнань пачфтезе Мордовияв. Теньгушевскяй райононь Шокша велеть колга кулендсь радня ломаненц эзда. Ся и макссь совет: рамамс тяса куд. Москуса шачф-касф авась арьсесь-арьсесь, тяфта и тись. Шокша велеса теенза няфтсть несколька куд. Эста сон самай получазе омбоце иденц инкса тядянь капиталть. И ня ярмакнень лангс рамась эряма васта. Савсь кой-мезе тиемс, петемс. И ётась Мордовияв кафцьке шабанзон мархта.
Мезьса занязе прянц Шокша велеса? Ушедсь перень сёронь, иможень касфнема. Участкасонза касыхть марлюфт, облепиха, инезикст—синь пинге ни одкстоптомс, чивге, вишняфкст, сливакст, равжа шукшторукст, помидорат, модамарьхть и перень лия сёрот.
Тянь вельде и трясь пря семьянц мархта, а нинге заняфоль мишендемань тевса.
Авась эста получась социальнай контракт—безвозмезднай целевой субсидия. Контрактть мяльса кирдезь макссеви субсидия, и кда ломанць карьхцясы сонь образовательнай курснень инкса пандоманди, работань вешеманди, оборудованиянь рамамс, эста мрдафтомс субсидиять аф сави. Социальнай контрактть вельде Анастасия Анатольевна рамась сушилка, блендер, эендафтомань ларь, кядьгонь шташендома, переса и садса эрявикс паршихть, кядьгот. Стаки анок тиемс переработка—косьфтамс перень сёротнень и фруктатнень, лекарственнай и чаень тишетнень, или анокламс специят, приправат, тяконь лувксса и заказс коре.
Шокша вели эряма ётамдонза меле собственностьсонза ульсь 73 сотка мода, конань лемнесы усадьбакс, и сатомшка оцю пере.
Ётась несколька киза, кода Анастасия Бабина кафта шабанзон мархта сась Шокшав эряма. Мезсь полафтсь эряфсонза?
2022 кизоня Анастасия Анатольевна лиссь рьвакс Шокша велень цёрати Андрей Бабинонди. Андрей Викторович покоди тостонь фермерскяй хозяйстваса, нинге якай вахтаса работама, да и кудсовок тевда фалу сатомшка.
2023 кизоня Бибиттнень шачсь стирнясна Алёна, теенза аф кунара топодсь кафта кизонят. 2024 кизоня авась арась тядякс нилецеда—белай свету эвондась Никита, конанди тяни 8 ковнят.
Оцюсь, Даша, курок шумордасы колмоце классть, Костя—васенцеть. Синь—васенце лездыхне шачфтыснонды. Тядяснон мархта кочкихть, валыхть, Даша сяватка потьни.
Анастасия Бабинась, кода и инголи, самозанятай, заняф касыксонь касфнемань тевса.
Бабиттне кирдихть сараст, сяват, касфтыхть сиволенди пурхцт. Аф кунара рамасть тракс и вазня.
Андрей Викторович тядде получась социальнай контракт, кона максфоль личнай подсобнай хозяйствать виияфтоманц инкса. Ня ярмакнень лангс мирттне-рьвятне и рамасть тракс и вазня.
Полатне путнихть сатомшка оцю пере—20 сотка модамарь, омбоце кизось—10 соткат тикла.
Кизефтине Москуса шачф-касф авать, тонадсь-аш велень эряфти, вдь сон тёждякс мзярдовок ашель. Отвечась, што вестевок ашезь каенда, мес ётась эряма Мордовияв, вели. Тяса, кле, сембось мялязон, а велень эряфти тонадонь пяк кунара.
Колмоце и нилеце шабатнень шачемаснон инкса максфоль тядянь региональнай (семейнай) капитал.
Эрямс и работамс Мордовияса—ня валхне пяк ладяйхть Анастасия Бабинати, кона ниле кизода инголе сась оцю ошста мокшэрзянь мастору!
Татьяна АЛЬШИНА.