Мокшень и эрзянь кяльхнень Всероссийскяй шисна келиста аськоляй кода Россиянь ламоц региоттнень, стане и Мордовиянь ошнень и райоттнень эзга.
23 апрельста кяленьконди лемтьф оцю ила ульсь Рузаевка ошса, А.В.Ухтомскяень лемса Культурань центраса. Аноклазь и ётафтозь сонь Рузаевскяй муниципальнай райононь Образованиянь управлениясь и «Тяштеня» иттнень эстетическяй воспитаниянь (национальнай культурань) центрась.
А.В.Ухтомскяень лемса Культурань центраса работась декоративно-прикладной творчествань мастерть, «Тяштеня» центрань педагогть, асу мокшавать Лариса Мироновать сюреса сёрматф работанзон выставкасна.
Мокшень и эрзянь кяльхнень шиснонды лемтьф пуромксти сашендсть сят, кинь тевоц кемоста сотф национальнайть ванфтоманц, виияфтоманц и сядовок содафокс тиеманц мархта.
Мероприятиять ушедомста кайгсь Российскяй Федерациять Гимнац.
2025 кизоть Российскяй Федерациянь Президентсь Владимир Путин азозе Отечествань аралаень кизокс. Тяда башка, тяддень 9 майста васьфтьсаськ Великай Отечественнай войнаса Сяськомать 80 кизонь топодеманц. Тя сембось якстерь сюрекикс таргавсь мялень салайста аноклаф пуромксть эзга.
Иласа примасть участия Рузаевскяй райононь оцюнять социальнай кизефкснень коряс заместителец Венера Ларина, Рузаевка ошень поселениянь оцюнясь Алексей Домнин, Рузаевскяй райононь администрациянь Образованиянь управлениять начальникоц Людмила Ковырева, Мокшэрзянь народть Межрегиональнай общественнай организациянц председателец Юрий Мишанин, Рузаевскяй райононь администрациянь Культурань управлениять начальникоц Лидия Козлова, Мордовия Республикань искусствань Заслуженнай деятельсь Василий Родионов, «Тяштеня» центрать директороц Анна Тишкина.
Рузаевскяй райононь оцюнять социальнай кизефкснень коряс заместителец Венера Ларина мярьгсь:
—Арась пара койкс эрь кизоня ётафнемс мокшень и эрзянь кяльхнень Всероссийскяй шиснонды лемтьф пуромкст. Республиканьконь лангса ащи мокшень и эрзянь кяльхнень и мокшэрзянь культурать ванфтомаснон коряс оцю ответственность. Рузаевскяй районць тиенди сатомшка оцю путкс тя тевти. Администрациясь фалу кирнесыне сятнень ширеснон, кит заняфт национальнай культурать, фольклорть мархта. Тячи оцю спасиба астама теест—образовательнай дошкольнай организациятнень руководительснонды, культурань учреждениянь работникненди и, конешна, сятненди, кит покодихть «Тяштеня» иттнень эстетическяй воспитаниянь центраса.
Марса улезь и работазь тейнек кемокснема патриотическяй «ваймоть» ся тевть вельде, конань тиендьсаськ. Тя национальнай культураньконь виияфтомац, мокшень и эрзянь кяльхнень и культурать ванфтомасна.
Рузаевскяй муниципальнай районть Почётнай грамотанц мархта казьфнень ёткса мокшавась, Рузаевкань 10№ идень садть воспитателец Наталия Зуева. Кой-кит казьфтольхть райононь оцюнять Благодарностенц мархта.
Мокшэрзянь народть Межрегиональнай общественнай организациянц председателец Юрий Мишанин поздравляндазень сембе пуромфнень илать мархта.
—Рузаевкаса ётафневи кода национальнай, стане и культурати целайнек лемтьф аф кржа пуромкс. Тяса ули и «Тяштеня» центра, кона лама тиенди минценнеть ванфтоманц инкса,—мярьгсь сон.
Юрий Александрович башка мяль шарфтсь сянди, што мокшетне и эрзятне эряйхть кода Мордовияса, стане и странаньконь ламоц лия региононзон эса. Лама вастова улихть мокшэрзянь центрат, общинат. Мокшетне и эрзятне пуромкшнихть марс и башка мяль шарфнихть кяльхнень ванфтомаснонды.
Тяда башка, сон лятфтась Ельмеевскяй лувоматнень, Учватовскяй лувоматнень, оцю и эрявикс лия пуромкснень квалма, конат улендихть Рузаевскяй районца.
Межрегиональнай организациять Благодарностенц получазь сят, кит аф ащихть озадонь седихть минценнеть ванфтоманцты.
Мордовия Республикань искусствань Заслуженнай деятельсь, композиторсь Василий Родионов—Рузаевскяй райононь Цифтамаз велеса шачф мокшалясь кирди кеме соткст земляконзон мархта, сидеста сашенды ётафневи пуромксненди. Вов и тя мезтьке сашендсь казне мархта. Василий Сергеевичень лиссь «Сире морось—одонь вайгяльса» книгац-сборникоц, конань казезе «Тяштеня» центрати.
Концертнай цебярь программа няфтсь «Тяштеня» центрась. Сценать лангс морама и кштима лисендсть педагокне и иттне. Кайгсть мокшэрзянь кунардонь, мокшень тяниень пингонь и лия морот.
Татьяна АЛЬШИНА.
Фототне Николай КАРАНОВОНЬ.