Митяйкиттнень трудонь кельги семьясна

Оброчнай велеса лама шнама семьяда. Кепотьксокс ащи Митяйкиттнень семьясна.
Кудазорсь, Николай Павлович, шачсь тя велеса 1953 кизоня. Аляц, Павел Дмитриевич, Великай Отечественнай войнань ветераноль. Марнек эряфонц максозе колхозонь тефненди. Тядяц, Варвара Павловна, покотькшнесь санитаркакс Оброчнаень участковай больницяса, тылонь труженицаль.
Трудонь кельги ломаттне касфтсть ниле итть. И аньцек фкя цёрасна, Николай Павлович, нолдась юрхт шачема-касома вели. Шумордазе школать, сяльде служась армияса. М.Е.Евсевьевонь лемса МГПИ-нь физвоспитаниянь факультетть аделамдонза меле мрдась эсь шачема уженязонза. Аф лама пинге идень спортонь школать эзда покодсь тренеркс Крхтажень средняй общеобразовательнай школаса. Меле сявозь работама Оброчнаень основной общеобразовательнай школав. Тяса вятсь историянь и физвоспитаниянь урокт. А меле путозь директоркс. И тиендезень директоронь тефнень школать сёлгомозонза. Тя пингсь Николай Павловиченди аф юкстави мзярдовок. Школась ульсь инь цебярьхнень ёткса районца. Тянемс Николай Павлович шнамань валса лятфнесыне педагогическяй трудонь ветераттнень Полина Васильевна Брыхляевать, Анна Никитична Мелёшкинать, Людмила Николаевна Вергасовать и лиятнень. Школаса тонафнихневок сатнесть оцю сатфкст спортса, лисендсть сяськикс, призёркс предметнай олимпиадатнень, сяськоматнень эса. Тянемс велеса гордостень марязь лятфнесазь Галина Гусевать, Дмитрий Митяйкинонь, Максим Митяйкинонь, Юлия Чалдышкинать, Дмитрий Осинонь и лиятнень лемснон.
Марнек эряфоц сотф школать мархта и рьванц, Людмила Викторовнань. Тядянза-алянза, Матрёна Васильевна и Виктор Максимович, касфтсть вете итть. Сембе лядсть вели эряма. Людмила Викторовна аделазе Крхтажень средняй общеобразовательнай школать, тонафнесь Н.П.Огарёвонь лемса Мордовскяй госуниверситетонь филологическяй факультетонь мокшэрзянь отделенияса, получась мокшень, рузонь кялень и литературань учителень профессия. И вов ни 42 киза покоди школаса. Ушеткшнезе Оброчнаень школаса кувалгофтф шинь группаса воспитателькс. 2008 кизоста сявомок Оброчнаень школась арась начальнайкс, и Людмила Викторовнань сявозь трудендама Крхтажень школав.
Л.В.Митяйкина—кельгома рьвя, тядя, баба, щава. Николай Павловичень мархта касфтсть кафта цёрат и фкя стирь. Дмитрий и Максим лац тонафнесть школаса. Школаса и вузса тонафнемста фалу примсесть участия спортивнай пялькстоматнень эса и занцесть призовой вастт. Тяни кафцьке Москусот, покодихть МЧС-са. Юлия эряй Торбееваса. Митяйкиттнень касыхть кота уноксна.
Ульсь пинге, педагогическяй трудонь ветераттне кирдсть тракст, тувот, куднармотть, лия жуватат. Тянивок тевфтома аф лядондыхть. Оцю лезкс макссихть СВО-ти. Фалу прважсихть лезкс боецоньконди.