Атюрьевскяй райононь Потьма велеса ломаттне эряйхть козяста. Ташта кутт тяса васьфтят пяк шуроста. Кеподи мяль и Фёдорофнень эряма вастсна. Аф куд, а особняк. Вакссонза строяф од баня, ваймама вастт. Ков тят варжакста, няеви азоронь кядсь.
—40 киза эряме Северса,—корхтай Иван Иванович.—Но седиеньке фалу ульсть Потьмать мархта.—И мзярда эвондась возможность мрдамс ёмла родиназонк, эстокиге тиеськ тянь. Вестевок тянкса ашеме каенда.
Кода азозе мокшалясь, юрхта вастсост эряй сазороц, сяс сон строясь куд каршек. Родителенза, Иван Ефимович и Акулина Андреевна, трудонь кельги ломаттельхть. Синь Потьма веленнет. Трудендакшнесть васенда колхозса, сяльде «Красное знамя» совхозса. Кельгома рьвац, Елена Андреевна, Гремецяень. Тя велесь сувсесь Мошково-Никольскяй велень поселенияв. Тяни тя велесь аш ни Атюрьевскяй районть картанц лангса. Елена Андреевнань аляц, Андрей Степанович, Великай Отечественнай войнань ветераноль, районца содаф пчеловодоль. Тядяц, Федосья Кузьминична, кулось пяк рана. Мзярда Иван Иванович кучсь пялост кудат, атказама ашель. Смузю фронтовиксь, няемок сай пингонь овонц, шарьхкодезе, што стирец ули цебярь алянь кядьса. Од цёрась пяк трудонь кельгиель, сталмода аф пелиель. И трудонь кельгоманц, маштомошинц аф весть няфнезе од раднянзонды. Тяфта ни лиссь, што эряфонь кисна-янцна пачфтезь оттнень мянь Северу. Иван Иванович 40 киза трудендась «Роснефть» объединенияса. Покодсь пенсияс лисемдонза мелевок. Лац работаманкса казьф лама оцю казнеса. А Елена Андреевна профессияс коре бухгалтер. Трудендакшнесь васенда главнай бухгалтеркс образованиянь отделса, меле районнай газетань редакцияса.
Аньцек шнама валхт ули кода азомс Фёдорофнень идьснон колгавок. Синь эздост колма: кафта стирьхть и цёра. Колмоцьконди мирттне-рьвятне макссть высшай образования, цебярь воспитания. Валентина и Ольга эряйхть Москуса, покодихть Сбербанкса, Максим Иванович стане жа Москуса, сон предприниматель. Колмоцьке заняфт кельгома тевсост. Сашендыхть Потьмав тядяснон-аляснон варжама. Но сяда сидеста Фёдорофне синць якайхть столицав. Вдь идьтост башка синь нинге кота уноксна, конатнень пяк кельгсазь, конатненди аф азовомшка лажаткшнихть.
Тяни Иван Иванович и Елена Андреевна пенсиясот. Но ваймамать квалма афи арьсекшнихть. Эрь кизоня мезе-бди да строяйхть. Кирдихть сараст, улихть нешксна. А нинге Фёдорофне лезнихть СВО-ти. Мзярда Каргоньжяй велень поселенияса кочксихть боецненди гуманитарнай лезкс, мирттне-рьвятне мзярдовок аф лядондыхть ширеса. Оцю лезкс специальнай военнай операцияти максси и цёрасна Максим Иванович. Лезни сон и Каргоньжяй велень поселенияти.
Илья Вешкин.