Стрельниковаса кельгома ломатть

Торопкиттнень семьясна ащи кепотьксокс Атюрьевскяй райононь Стрельникова велеса. Иван Иванович шачемас коре шабрань Колапонаня велеста, трудонь кельги оцю семьяста, Нина Васильевна—Оцяду велень поселениянь Од Кярьгаста. Васедсть ня кафта ломаттне Пичепулоня велень клубса. Од Кярьгань стирсь школать аделамда меле покодсь клубса заведующайкс, а Колапонанянь цёрась ялганзон мархта сашендсь тяза ваймама. Солафтсть фкя-фкянь седи, крьвязсь ётксост кельгомань цятконя. Иван Торопкин пингть тарксема ашезь карма, эстокиге кучсь Од Кярьгав кудат. И вов 46 киза марсот. Строясть Стрельникова вели куд, водендасть оцю хозяйства. Мезе аньцек аф кирдихть пирьфсост. Оцю нешкопересна. Тя тевти кельгомась Иван Ивановичень эса эвондась нинге шабакс пингста. Родителензон фалу ульсть нешксна. А синь, шабатне, лезнесть оцюфненди. Мзярда Торопкинонь шачсь сонцень семьяц, сас мяльс вятемс алянц тевонц сяда тов.
Иван Торопкин аф кальдявста тонафнесь школаса. Ёт ёмласта пяк кельгозень жувататнень. И тя нинге сяс, мес пирьфсна пяшксель жуватада. Аделазе Краснослободскяень зоответеринарнай техникумть. Получась ветфельдшеронь профессия. А меле арьсесь, што фельдшеронь содамошитне аф сатомшкат, штоба цебярьста пчкафтомс жувататнень, максомс цебярь советт жуватань кирдихненди. Сяс техникумда меле поступась тонафнема вузу и сяньге аделазе аф кальдявста. И вов ни 46 киза трудендай ветврачекс Атерень ветеринарнай станцияса. Работац пяк эрявикс, ответственнай. Тевдонза фалу лама. Сон пчкафты Стрельникова, Кяшал велень поселениянь эряйхнень жуватаснон эса. И эсь работанц колга куленди аньцек шнама валхт. Кда киньге урмаськоды жуватац, эряви Иван Ивановичень ширде кодамовок лезкс, гайфтихть теенза и рана шобдава, и поздна илять, и праздникста, и ваймама шиста. Кенкшенза ветврачть фалу панжадот, телефоноц най отвечай. Мокшалясь лезды сембонди, киндивок аф атказай.
—«Кишалинский» совхозса трудендакшнень зоотехникокс, фермаса азоравакс,—корхтай Кяшалонь мокшавась З.М.Кяльгина.—А кда лиси мезевок жуватазень мархта, эстокиге тердьса И.И.Торопкинонь. Сон цебярь специалист. Тевонц фалу тисы совестьс коре. Жувататнень азорснон мархтовок фалу мушенды марстонь кяль.
Аньцек шнама валхт азсь колганза и райононь главнай ветврачсь М.В.Сиркин. Коллективса Иван Иванович трудендай кунара. Ламоц ялганза ваймосихть кудса, а Иван Иванович тянемс ащи кепотьксокс оттненди. Лама киза марса работайхть Ф.Ф.Турнаевонь, Н.П.Чудаевонь, И.И.Пятыркинонь и лиятнень мархта.
Мирденц эзда мезьсовок аф лядонды и Нина Васильевна. Сонь трудонь стажец 47 киза. Тонафнесь Краснослободскяень зооветеринарнай техникумса. Покодсь «Партизанский» совхозса и дояркакс, и ветфельдшеркс. Тяни Н.В.Торопкина ветфельдшер районнай ветеринарнай станцияса. Лац покодеманкса казьф аф фкя оцю казнеса.
Васенце вастса Торопкиттненди ащи семьясна. Мирттне-рьвятне касфтсть кафта стирьхть. Кафцьке лац тонафнесть школаса, меле аделазь Мордовскяй госуниверситетонь Медицинскяй институтть. Тяни Александра Ивановна медицинскяй наукань кандидат, вятьсы вузса идень хирургиянь курсть. Сонь колма шабанза. Оцю стирец, А.Н.Окунева, тусь родителензон киге. Тонафни врачекс Москувонь вузса. Иван и Нина тонафнихть школаса, кафцьке отличникт. Лидия Ивановна эряй Саранскяйса, сон врач-косметолог. Яна стирнянцты сисем кизот. Тядде сон моли васенце классу. И идьснон, и унокснон инкса Торопкиттне маряйхть оцю гордость.
Эряфсь аф ащи фкя вастса, аськоляй инголи. Кизос коре Торопкиттненди кунара ни улемаль пенсияса. Но синь кодавок аф явовихть кельгома тевснон мархта. Да и велеряйхненьге аш мяльсна явомс мархтост. Конашкава кельгсазь синь ломаттне, тя эряви няемс.
Илья СИДОРОВ.