Тяддень январьста Зубово-Полянскяй райононь Велезем велеса панчфоль Культурань од куд. Тяни эсонза ётафневихть илат. Мярьгат, аф кунара велеряйхне васьфтезь Масланцять, а тяни тага лама ломань сась концертс, кона лемтьфоль Сяськомань шити.
Велеть историяса васенцеда 9 Майста ульцява ётась «Бессмертный полк» шествиясь. Свято-Варсонофиевскяй авань монастырть эзда Культурань кудти велеряйхне кандозь родной ломаньцнон фотографияснон, конат ётазь Великай Отечественнай войнать. А геройда велеса аф кржа, пцтай эрь семьяста тушендсть воявама.
14 частста Культурань кудса ушедсь оцю концерт. 100 вастонди зрительнай залу ашесть тяльгонде ломаттне. Путнесть стулхт и эзепт. И шарьхкотьф мес. Вдь тячи сценать лангса оцю концерт няфтсть ниле велень школатне. Творческяй номерхт анокласть Велеземсь, Бзновкась, Каргалсь, Потманясь. Ушедозь концертть азорхне—Велеземсь. Вятикс ульсть рузонь кялень и литературань учительсь Марина Алексеевна Ташкаева и 3-це класса тонафнись Дарья Бабина. Велезем велень школань учительхне моразь «Суронь пачат» мороть. Сяда тов иттне учительхнень мархта марса няфнесть сценкат, азондсть стихт, морасть морот, кштисть.
Концертть поладозе Бзновкань (Новые Выселки) школась. Мельгаст Сяськомань шити лемтьф номерхт няфтсь Потманясь (Тарханская Потьма). Сяльде—Каргалсь. Эрь велеть эзда выступандасть аф аньцек школаса тонафнихть, но и велеряйхть. Сяс илась афкукс арась тяфтама васедемакс, кона пуроптозень марс велетнень и ломаттнень.
«Культурань кудсь строявсь маласа ащи сембе велетненди. Сяс тячиень концертти тердеськ тонафнихнень аф аньцек Велеземонь школаста. Илада инголе ётафтовсь аф фкя репетиция. Концертть эса ульсть аф оцю ёшмонят, но оцюшкац, койсон, ётась лац»,—мярьгсь илада меле велень Культурань кудть заведующаец Марина Николаевна Канина.
Аф ваномок сянь лангс, што 9 Майсь—кенярдемань ши, но ломаттнень сельмоса сяка эвондакшнесть сельмоветть. Шабатне нинге весть лятфтазь сембонди, кодама стака пингонь пачк ётасть минь атяньке-бабаньке. Концертсь мольсь 3 частт, сембе ваныхне ащесть мекольце номерти.
Коридорса ломаттнень учезь пси чайсь и ямсь. Ярхцамбяльть монастырсь максозе питнефтома. Клубть инголе ульсть крандазс кильтьф алашат. Кинь мялецоль—арнесть велеть келес. 6 частста илять ушедсь од ломаттненди дискотека. А мзярда шоподсь, ульсь фейерверк.
О. БЕЛКИНА.