Лама веконь историяста российскяй ошне, велетне аф весть палондсть педа-пес. Толонь кяльхне, ётнемок фкя вельхксста омбоцети, нилендсть башка ульцят и кварталхт. Толть каршес ащемс киньге ашесть сатне виенза. Оцю ошнень эзда ляткшнесть палы-качады вастт. И государствать инголе стясь кизефкс: кода араламс паршить и инь главнайть—ломаттнень эряфснон?
XV векти ушедсть эвондакшнема москувонь княснень противопожарнай безопасностть колга васенце указсна. 1649 кизонь 30 апрельста Русьса нолдафоль документ, кона тись ушеткс профессиональнай пожарнай охранати—«Наказ о городском благочинии». Лиякс азомс, тя ульсь российскяй противопожарнай васенце службать тиеманц колга указсь. Россияса пожарнай тевсь коль вииякшнесь. 1917 кизонь Октябрьскяй революцияда меле пожарть мархта сотф прябалатне путфтольхть государствать инь эрявикс задачанзон серьс. 1918 кизонь 17 апрельста российскяй правительствась подписандась «Толть мархта тюремань государственнай мератнень организацияснон колга» декрет. Сон тись ушеткс советскяй пожарнай охранати. 2018 кизонь 17 апрельста Советскяй пожарнай охранати топодсь 100 киза. 2001 кизоня, кирдемок мяльса Российскяй Федерациянь Президентть Указонц, Государственнай противопожарнай службась ётафтовсь Стихийнай бедствиятнень лятксснон машфтомаснон и чрезвычайнай ситуациятнень, гражданскяй оборонань тефнень коряс Российскяй Федерациянь министерствати. Тячи эрь шиня Мордовия Республикань Араламань 112 службав эрь шиня поступси кемотть гайфтема пожаронь лисемать колга. Но стама зиян, кода ульсь инголи, толсь аф тиенди. И тя удалси пожарнайхнень работаснон вельде, конатненди аськолдамс юрнай толти и араламс ломанть—эрь шинь тев. Сембода сидеста боевой задачатне решандакшневихть дежурнай караулть виензон—пожарнайхнень работаса основной тактическяй подразделениять работанц вельде. Тревогать коряс срхкаманди личнай караулть марнек составонцты макссеви пяк кржа—45 секунда. Тя пингста теест щама боевой щам, занямат эсь вастсна машинаса и ардома пожарть вастонцты. Пожарть матоманц коряс группать руководителенцты аш кода эльбятькшнемс работанц тиемста. Сон отвечай путф задачатнень, пожарнай охранань сотрудникнень безопасностьснон, канды ответственность ломаттнень араламаснон инкса. Кирьфтамс регионца пожархнень лувксснон ули кода синь инголдамаснон коряс ламоц мероприятиятнень вельде. Профилактикань инь цебярь способсь—тя населениять пожарнай безопасностень правилатненди и происшествиять лисеманц пингста действиятненди тонафтомац. Главнай управлениять инспекторскяй составоц эрь шиня ётафни пирьфнень ланга обхотт, населениять мархта васедемат, а стане жа пожарнай безопасностть коряс занятият, пожарно-спасательнай техникать няфнеманц мархта социально-профилактическяй акцият, явонды нагляднай агитация. Тя работась максси пяк цебярь результат—эрь кизоня кири пожархнень пингста кулси ломаттнень лувкссна. Мзярда кайги тревогась, пожарнайхне аф содасазь, мезе учсыне синь инголе, и эрь тердемада меле кярьмотькшнихть тевс пяк курокста. Пожарнай охранань сотрудникне фалу работайхть фкя командаса. Тяза сашендыхть сят, кит аф пелихть стакада-сталмода, кинь лангс ули кода надиямс. И рузонь содаф писательть Гиляровскяень ётай веконь 20-це кизотнень лисьф валрисьмонза ляткшнихть тячиень шиннекс тянемс: эрь пожарнайсь—герой, эряфоньберьф войнаса, эрь минутаня—пелькс уленди эряфонцты.