Артём Здунов примась участия заседанияса

Мордовиянь Оцюнясь Артём Здунов 8 августста Пермь ошса примась участия Россиянь Президентть ПФО-са полномочнай представителенц видеса Советть заседанияса, коса ванондовсть социальнай лезксонь и ширень кирдемань мератне, конат макссевихть СВО-нь участникненди и синь семьянь членцнонды. Заседаниять ётафтозе Россиянь Президентть ПФО-са полномочнай представителец Игорь Комаров.
ПФО-нь региоттнень эса ётафневихть эряфс СВО-нь участникнень и синь семьянь членцнон ширеснон кирдемань мератне. «Округонь региоттнень эса тевс нолдаф 200 мера, конат водендафт военнослужащайхнень и спецоперациянь ветераттнень трудоустройстванкса, эсь тевонь панжеманкса, медицинскяй реабилитациянь ётаманкса, юридическяй и психологическяй консультациянь максоманкса. Льготатнень оцюшка пялькссна водендафт эряфонь цебярь условиянь тиеманкса»,—азозе полпредсь.
Игорь Комаров макссь оцю оценка ся работати, кона арьсеф округса тя направленияса задачатнень коряс, конань путозень странань Президентсь Владимир Путин. Полпредть валонзон коряс, СВО-нь зонаста эрь мрдайти ули кода получамс аф аньцек социальнай лезкс, но и мумс эряфса эсь прянц.
«Округонь сембе региоттнень эса нолдафт тевс региональнай образовательнай программат, конат малат «Время героев» федеральнай программати. Содафт ни финалисттне—1088 ломань, конатнень эзда 645-сь ётайхть очнай тонафнема, 443-сь—резервасот. Округса СВО-нь участникне стане жа примсихть участия политическяй эряфса. Тяфта, 2024 кизоня спецоперациянь 60 ветеранць кочкафт эрь-кодама уровенень законодательнай и представительнай оргаттненди»,—китькстазе полпредсь Игорь Комаров.
Тячи боецненди лезкс макссихть и округонь эряйхне. Волонтёрхне и общественнай организациятне прважсихть военнослужащайхненди гуманитарнай груст.
Мордовиянь Оцюнясь Артём Здунов азондсь уникальнай форматть—«День участника СВО» проектть колга, конань рамкаса эрь-кодама направлениянь специалисттне улендихть республикань райоттнень эса и макссихть сембе ширдень лезкс специальнай военнай операциянь участникненди. Эсь опытснон колга стане жа пачфтсть Нижегородскяй областень губернаторсь Глеб Никитин, Башкортостанонь оцюнясь Радий Хабиров и Пензенскяй областень губернаторсь Олег Мельниченко.
Тиемок заседанияти итокт, Игорь Комаров китькстазе, што округонь Советть основной задачац ащи решениятнень эряфс ётафтомаса, а стане жа спецоперациянь ветераттнень реабилитацияса и адаптацияса. Тяда башка, лама тиендеви федеральнай уровеньца: Президентть поручениянц коряс тиф военнослужащайхнень ширень кирдемань кизефкснень коряс РФ-нь Госсоветонь комиссия; федеральнай окрукненди аноклаф региональнай и муниципальнай мерань ширень кирдемань базовай стандарт.
Игорь Комаров лятфтазе, што округонь Советть предложениянза сёрмадовихть протоколса. Советса примасть участия «Время героев» президентскяй программань участникне Иван Амиров и Марат Сибаев, конатненди наставникокс ащи ПФО-са полпредсь.