Экономикать виияфтоманкса примсеви мератне

23 июньцта Мордовиянь экономикать ширень кирдеманц и кемошинц ванфтоманц коряс антикризиснай штабть заседанияса ванондовсть сембе отраслятнень эса уликс тефне, а стане жа государствать ширде ширень кирдемань мератнень эряфс ётафтомасна.
Отмечафоль, што Петербургскяй международнай экономическяй форумса Россиянь Президентсь Владимир Путин азозень социальнай и экономическяй сфераса виияфтомань главнай принципнень. Ётксост—граждаттнень и предпринимательствать сяда товолдонь ширень кирдемасна, ошень средать и велетнень территорияснон мазоптомасна-петемасна, жилищно-коммунальнай хозяйствать одкстоптомац и туризмать виияфтомац, а стане жа пяк важнай внутренняй технологиятнень виияфтоманкса мероприятиятне. Россиянь Президентть мярьгоманц коряс, РФ-нь Правительствась кемокстась 9 процентста сявомок 7 процентти молемс льготнай ставкать кирьфтаманц коряс ипотекать колга постановления, а стане жа кемокстаф федеральнай финансирования мархта китнень петемаснон коряс вете кизонди план. Кинь строяманди и петеманди субъекттненди нолдави 5 триллионда лама цалковай.
Мордовиянь Правительствать Председателец Владимир Сидоров мярьгсь, што регионть задачац—педа-пес нолямс тевс сембе возможносттнень, конатнень макссесыне федеральнай центрась. «Профильнай министерстватненди эряви сяда эрьгавста ётафнемс эряфс федеральнай ширень кирдемань мератнень республикань предприятиятнень и организациятнень эса»,—мярьгсь сон.
МР-нь экономикань, торговлянь и предпринимательствань министрсь Алексей Грибанов азондсь заседаниянь участникненди ёмла и средняй предпринимательствань субъекттнень ширеснон кирдемань мератнень эряфс ётафтомаснон, тяконь лувксса федеральнай од мератнень колга. Стане жа 9,5 процентти молемс ключевой ставкать кирьфтаманц колга, пассажирскяй перевозкань сферать кредитнай каникулань макссеви отраслятнень лувксс сувафтомать колга, велень ипотекань программать ширень кирдеманкса 7 миллиартт цалковаень нолдамать колга.
Регионть цифровой виияфтоманц коряс министрть васенце заместителец Наталья Санина азондсь IT-отрасляса ширень кирдемань уликс мератнень колга. Президентсь Указсонза валхтозе прибыльть эзда налогть информационнай технологиянь сферань предприятиятнень лангста.
Промышленностень, наукань и од технологиянь министрсь Игорь Губайдуллин мярьгсь, што Мордовиянь кота промышленнай предприятиятне макссть льготнай кредитонь получаманкса заявкат. 3,4 миллиард цалковаень питнес вете кредиттне кемокстафт. Промышленностень виияфтомань федеральнай фондть экспертнай советоц кемокстазе льготнай займань максомать минь республиканьконь кафта компаниянзонды: «Гласс «Декор» РСК-ти и «ЭМ-Кабель» заводти.
Велень хозяйствань и продовольствиянь региональнай министерствать руководителец Александр Кечайкин азозе, што Мордовияса агропромышленнай комплексонь предприятиятненди 5 процент алу нюрьхкяня пингонь льготнай кредитт сявсть 36 заёмщиксь, марстонь суммась—7 миллиартт цалковай. Стане жа аграрийхне келиста нолясазь тевс государствать ширде ноляви ширень кирдемань сембе мератнень.
Заседаниять штабса стане жа ванондовсть Мордовиять спортивнай инфраструктуранц и ЖКХ-нь сферать виияфтомаснон коряс ширень кирдемань федеральнай мератне.