Казьф Мужествань орденца

Николай Становкинонь ушедонь содамонза нинге Од Кярьга велень школаса тонафнемстонза. Цёранясь трудонь кельгиель, сембоса кепотьксокс ащесь ялганзонды. Фалу лезнесь родителензонды кудонь тевса. Мяльса кирдезень щаванц мархта щятянц Прасковья Васильевнань и Николай Иванович Путяйкиттнень.
Николаень родителенза трудонь кельги мокша ломатть. Тядяц, Любовь Николаевна, покотькшнесь почтаса, Оцяду велень сире ломанень пансионатса. Аляц, Пётр Иванович, сембе эряфонц максозе велень хозяйствань тефненди.
Николайда башка Становкиттнень нинге цёрасна и стирьсна. Иван Петрович—полициянь капитан, трудендай участковайкс. Оксана Петровна покоди Мордовия Республикань УФСИН-нца. Сон капитан. Аф тёждяста ладявсь эряфоц Николай Петровичень. Школада меле служась армияса. Тоса пуроптсь эстеенза семья. Касыхть кафта стирнянза. А меле эряфсонза ульсть Сириясь, Нагорнай Карабахсь. Сяльде ушедсь специальнай военнай операциясь, коза Николай Становкин тусь эстокиге. Стакаста ранендафоль. Куватьс пчксесь госпитальса. Меле мрдась Атерь аймаконь Оцяду вели, эряй родителензон мархта.
Аф ваномок стака ранениять лангс, Николай Петрович васьфни школаса тонафнихнень мархта, азонкшни эсь боевой кинц колга. СВО-нь ветеранць ульсь районнай библиотекаса, Атерь велень 1№ средняй общеобразовательнай, Перевесьянь основной школатнень эса, лия вастса. «Защитники Отечества» фондонь Атерень райононь координаторсь Т.П.Полькина азсь Николай Становкинонь колга лама шнамань валда. Кодама илас афолезе терде, вестевок аф атказай. Тяфтама ломаттнень лангс ванозь касыхть афкуксонь патриотт, Родинань аралайхть, кельгихть.
Мужестванкса, отваганкса, эсь прянь аф ужяльдеманкса Россиянь Президентть В.В.Путинонь Указонц мархта казьф Мужествань орденца. Торжественнай церемонияса, кона лемтьфоль Российскяй Федерациянь Государственнай флагонь шити, оцю казнеть Н.П.Становкинонди максозе Мордовия Республикань Оцюнясь Артём Здунов.
Илья Вешкин.