21 августста Саранскяйса ётафтовсь межнациональнай и межконфессиональнай отношениятнень коряс Советть заседанияц, конань вятезе Мордовия Республикань Оцюнясь Артём Здунов. Советса васенце вастса ульсть тяфтама кизефкст: кода араламс од ломаттнень социальнай сетень кальдяв повесткать эзда. Мольсь корхтамась лия странаста саф од ломаттнень социальнай и культурнай адаптацияснон колга, сянь квалма, кода ванфтомс этнокультурань эсь лацонь ширетнень, лама нациянь ломаттнень ёткса ладямать.
Мордовия Республикань Оцюнясь отмечазе, што Советсь—традиционнай питнишитнень коряс мялень-арьсемань азонкшнемс пяк оцю и эрявикс площадка. Эзонза сувсихть региононь национально-культурнай и религиознай организациянь оцюнятне, конат примсихть участия государственнай национальнай политикать эряфс ётафтомаса. А тиф сон Россиянь Президентть Владимир Путинонь поручениянц коряс.
—Минь старандатама ванфтомс сянь, мезе кадсть тейнек атянь-атяньке. Тейнек эряви разнай национальностень ломаттнень ёткса ладяма, шарьхкодема. Мордовияса пцтай 500 религиознай организация, 33 общественнай объединения, конат работайхть эрь-кодама национальностень ломаттнень мархта.
Республикасонк 400 православнай храм, 5 мечетть. Строяф 20 од храм. Ниле кизоста ётафтоме 500-та лама этнокультурнай направлениянь ила,—азозе Советть заседаниясонза Артём Здунов.
Мордовиянь Оцюнясь башка отмечазе, што минь республикасонк аш кодамовок конфликтт разнай национальностень, конфессиянь представительхнень ёткса. Тя корхтай сянь квалма, што миньцонк аш аф ладяманди кодамовок туфталхт.
—Но тя тевсь фалу кирдема мяльса. Эрявихть араламс од ломаненьке. Тейнек фалу улема синь вакссост. Араламат синь интернет-пространствать, социальнай сетьтнень эзда, сяс мес тоса мушендыхть лама аф содаф ялгада. А синь цебяренди аф вятихть,—мярьгсь Артём Здунов.
Од ломаттнень мархта эряви васьфнемс, няфтемс теест цебярь пример, кулемс синь мяльснон-арьсемаснон, содамс, мезсь синь таколфтсыне, пичефтьсыне. Сяда лама корхнемс койхнень-обуцятнень колга, няфтемс синь эрявиксшиснон.
Кода ётафтови эряфс республикасонк государственнай национальнай политикань стратегиясь, азондсь Мордовия Республикань культурань, национальнай политикань и архивнай тевонь министрсь С.Н.Баулина.
Государственнай национальнай политикать основаса ащихть нравственнай ориентирхне, конат минь культурнай кодсонк. Мордовияса ялгаксшиса, ладямаса эряйхть разнай нароттне сядонь киза. Республикась мяляфтсыне ся мокшэрзятнень, конат эряйхть лия региоттнень эса. Россиянь субъекттнень эса Мордовия Республикань 31 представительства. Маластонь пингть эвондай нинге вете.
Тяфта жа Советонь заседанияса азфоль, што маластонь пингть Мордовияса ётафтови Од ломанень форум.
Илья Вешкин.