Кремляса Артём Здуновонь Россиянь Президентть Владимир Путинонь мархта корхнемасна

5 июльста Москуса ульсь Россиянь Президентть Владимир Путинонь и Мордовиянь Оцюнять Артём Здуновонь рабочай васедемасна. Региононь руководительсь пачфтсь Президентти республикаса социально-экономическяй тефнень колга.

Владимир Путин васедемать панжемста азозе: «Целайнек тиньцонт ситуациясь мялень пети, стабильнай: ВВП-сь касфневи, промышленнай, велень хозяйствань производстватне, строительствась касфневихть. Виде, кой-мзярошкада кирсь основной капиталти инвестициятнень объёмсна. Эрь, семботь колга корхтатама, а сяльде нинге прябалатнень ванцаськ, конатненди эряви шарфтомс башка мяль».
Артём Здунов пачфтезе Президентти, што ковидть мархта тефне республикаса ладявсть. Медицинскяй сембе учреждениятне работайхть штатнай режимса. «Минь нолясаськ тевс тя пингть сянкса, штоба ётамс профилактика, медосмотрат, башка—эряфкшу ломаттнень ёткса. Ну и, конешна, вакцинациять и ревакцинациять»,—мярьгсь республикань вятись.
Кда корхтамс экономикать колга, 2021 кизось, сембе основной показательхнень коряс, шумордавсь лац. Инвестициятнень объёмснон кирьфтамасна сотф сянь мархта, што 2020 и 2021 кизотнень регионть ульсть инфраструктурнай кой-кодама ограничениянза государственнай шумоть лувксонц инкса. «Тяни синь тейнек сяськовомшкат»,—азозе Артём Здунов.
Ётай кизонь декабрьста Российскяй Федерациянь Правительствась примазе Мордовия Республикать виияфнеманц коряс вете кизонди башка программать. Сон водендаф самай сянкса, штоба касфнемс инвестициятнень, виияфнемс инфраструктурать, касфнемс заработнай платать. «Программань васенце кизось ушедовсь, и 25 оцю проектть коряс 84 миллиард цалковаень питнес инвестициятнень минь нолдаськ тевс. Тяда башка, вете кизот ашезь касфнев ёмла и средняй бизнесть лувксоц. Тяни няеви касомась. Строительнай отрасляса основной капиталти инвестициятнень объёмснон коряс тефне ащихть сяда лац: 106,9 процент мархта минь шумордаськ ётай кизоть, а тядде май ковти 119 процент мархта ни».
Башка кизефкссь, конанди эряви шарфтомс сяда оцю мяль, кода азозе республикань руководительсь,—тя заработнай платать и населениять доходонзон касфтомасна. Средняй заработнай платась регионца цютькада касфневи—кизоть пенцты сон ульсь 36 тёжянь цалковай, кирьфневи ёмла доход мархта ломаттнень лувкссна (2021 кизоня эздост ульсь 139 тёжянь ломань, тяни—128 тёжянь).
Вете кизонь программать важнай ширензон эзда фкясь—Саранск—Рузаевка агломерациять виияфтомац. Мордовиянь Оцюнясь отмечазе, што Саранскяйсь—тя научнай оцю центра, ошса тонафни 40 студент 49 странаста. Виияфневи машиностроениясь, светотехникась и промышленностень лия ширетне.
Башка корхтафоль промышленностьса тефнень колга. Промышленнай производствань индекссь ётай кизоня ульсь 108 процент, тяддень май ковти—107 процент. «Лац-ряц ваттама предприятияньконь заказса пяшкотькшнемаснон мельге, башка мяль шарфнетяма импортть полафтоманцты, работатама гигантоньконь мархта—тя «Ростсельмашсь», РЖД-сь, «КамАЗсь»,—азозе Артём Здунов.—Старандатама, штоба сянь ламошканц, мезть нолясаськ тевс, мярьктяма, велень хозяйстваса, тя—велень хозяйствань техниканди комплектующайхне, минь синь нолялеськ эсь ширесонк».
Мордовиянь Оцюнясь азондсь «Биохимик» предприятиять колга, кона нолнесы «Арепливир» содаф препаратть. Тядде заводсь нолдасы тевс активнай фармсубстанциянь производствать, а сай кизоня—онкологическяй препаратонь производствать. Тя пцтай 20 миллиард цалковай инвестиция, несколька сятт рабочай васта.
Мордовиянь Оцюнясь башка мяль шарфтсь оптоволокнать производстванц лангс.
Стане жа корхтафоль АПК-са тефнень колга, тяконь лувксса ванондовсь импортонь полафтомать коряс работась.
«Велень хозяйстваса миньцонк ули касома основной показательхнень коряс. Сахарть производстванц коряс тядде стане жа макстама цебярь валовай объём. Алонь, лофцонь и сиволень продукциять производстваса миньцонк стане жа ули касома. Кда сявомс сырхнень производстваснон, тяса минь сисемце вастти лисеме, колбаснай изделиятнень коряс—нилеце вастти. Корматнень касфнесаськ минць, заняфтама животноводстваса, растениеводстваса и птицеводстваса, минць сяльде тиенттяма переработка»,—азозе республикань руководительсь.
«Продукциясь цебярь качествань,—отмечазе Владимир Путин.—А идень ярхцамбяльхне школатненди тинь паксянтень эзда пачфневихть?»
Артём Здунов, кона вятьсы образованиять коряс РФ-нь Государственнай Советонь комиссиять видеса школьникнень андомань кизефкснень коряс рабочай группать, азозе, што сырьёть, кона пачфневи школьнай ярхцамбяльхнень анокламанкса, 82 процентонц нолясазь региононь велень хозяйствань производительхне. «Минь рамсесаськ видеста производителеньконь кядьста, посредникфтома,—мярьгсь республикань руководительсь.
Сай кизоня Мордовиясь арьсекшни пингта инголе шумордамс ломаттнень аварийнай эряма вастста ётафтомань программать эряфс ётафтоманц. Тячи регионца касфневихть строительствань темпне, тя ширети шарфневи башка оцю мяль.
Стане жа корхтамась мольфтевсь Донбасста, Луганскяйста и Мариупольста ломаттнень примамаснон колга. «Ширезонк сась 649 ломань. Сембонди теест максфт эряма и работама вастт республиканьконь 12 районца»,—азондсь сяда тов Артём Здунов.
Мордовиянь Оцюнясь спасибась Россиянь Президентти здравоохраненияса ширень кирдеманкса, мезть вельде меля регионца сувафтфоль стройс идень республиканскяй клиническяй больницять хирургическяй корпусоц, строяф республиканскяй онкологическяй диспансерть поликлиникац.
Артём Здунов пшкядсь странань Президентти эняльдема мархта стака ситуациять коряс, кона сотф онкологическяй урматнень эзда оцю лувксонь кулсематнень мархта: «Татьяна Алексеевна Голикова и МР-нь Здравоохранениянь министерствась кирнесазь минь онкологическяй госпиталеньконь реконструкциянц ширенц. Сяс мон пшкядян Тейть ширень кирдеманкса. Сюкпря».
Корхтафоль образованиянь системать инфраструктуранц одкстопнеманц и асу шабатнень ширеснон кирдемаснон колга.
«Владимир Владимирович, ульсь Тонь порученияце ваномс республикаса финанснень мархта сотф тефнень»,—пшкядсь государствань оцюняти Артём Здунов.
«Мон шарьхкодьса, тя сатовсь Тейть наследствас коре, но ситуациясь мзярс аф простой»,—китькстазе прябалать Россиянь Президентсь.
Мордовиянь Оцюнясь пачфтезе, што 3,5-крда федеральнай центрать ширень кирдеманц вельде кирьфтаф республикать кредиторскяй шумоц, пцтай 8,8-крда—бизнесть инголе шумось.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...