МР-нь оцюнясь Артём Здунов примась участия Петербургскяй международнай экономическяй форумса

Санкт-Петербург ошса 15 июньцта сявомок 18 июнти молемс ётафтовсь Петербургскяй международнай экономическяй форумсь. Сонь работасонза примась участия Мордовия Республикань делегациясь региононь Оцюнять Артём Здуновонь руководстванц ала.
Петербургскяй международнай экономическяй форумсь—тя эсь лацонь события экономикаса и бизнесса. Тяса васетькшнесть деловой кругонь представительхне и ванондовсть главнай экономическяй кизефксне. Форумса примась участия Россиянь Президентсь Владимир Путин.
16 июньцта Мордовиянь Оцюнясь корхтась «Здоровое общество» дискуссионнай площадкаса, коса кепсевсть отечественнай фармацевтическяй отраслянь касомань-вииямань кизефксне.
Тяка жа шиня Артём Здунов примась участия дискуссионнай площадкатнень эзда фкаса—«Здоровое общество: курс на инновации и поддержку российского производителя» РБК-ть сессияса. Мордовиянь Оцюнясь эсь корхтамасонза башка лоткась сянь лангс, што фармацевтикась сувси республикати главнай направлениятнень лувксс и занци эрявикс васта регионть инвестиционнай ширесонза.
Азондомок регионть и «Биохимикть» марстонь тевонь вятемаснон колга, Артём Здунов шарфтсь мяль наукать и образованиять ёткса сотксонь кирдемати. Тя няеви «Биохимик» заводть и Н.П.Огарёвонь лемса МГУ-ть примерса, конат марса ётафнихть исследованият и разработкат лекарственнай препаратонь нолямань технологиятнень виияфтоманкса. Од коронавируснай инфекциять каршес тюремась няфтезе ня соткснень оцю результатснон.
Петербургскяй международнай экономическяй форумса Артём Здунов ётафтсь лама рабочай васедема. Фкясь эздост Россиянь отельеронь и рестораторонь Федерациянь президентть Игорь Бухаровонь мархта. Ванондовсть инжиень примамань сферать виияфтоманц, гостиничнай услугатнень качестваснон цебярьгофтомаснон, регионть туристическяй ширде мялень салайкс тиеманц, а стане жа предпринимательхнень ширень кирдемаснон коряс единай информационнай порталть тевс нолдаманц и «Тиф Россияса» региоттнень эса импортть полафтоманц виияфтоманц коряс кизефксне.
Петербургскяй международнай экономическяй форумть мяльса кирдезь «Россия—страна возможностей» АНО-ть и Мордовия Республикань Правительствать ёткса кемокстафоль соглашения, кона водендаф сотрудничендамань кеме сотксонь кирдемати.
Шить омбоце пялестонза Артём Здунов ётафтсь рабочай васедема ВЭБ.РФ ошнень виияфтомаснон коряс главнай управляющай партнёрть Ирина Макиевать мархта. Корхтамась мольфтевсь Саранскяйса и республикань моноошнень эса инвестиционнай проекттнень эряфс ётафтомаснон колга.
Стане жа Артём Здунов васетькшнесь Россиянь просвещениянь министрть Сергей Кравцовонь мархта. Корхнемста кепсевсть образованиянь сфераса кой-кона проекттнень эряфс ётафтомаснон коряс кизефксне.
17 июньцта Петербургскяй международнай экономическяй форумть работанц пингста Мордовиянь Оцюнясь Артём Здунов, Чувашия Республикань Оцюнясь Олег Николаев и Ульяновскяй областень губернаторсь Алексей Русских кемокстасть научно-техническяй сотрудничендамать коряс соглашения.
Стане жа тя форумса кемокстафоль Мордовия Республикать, промышленниконь и предпринимателень Российскяй союзть и республиканскяй промышленниконь и предпринимателень Союзть ёткса сотрудничендамать колга соглашения. Тя документть алу кядьснон путозь Мордовиянь Оцюнясь Артём Здунов, РСПП-нь президентсь Александр Шохин и «Союз промышленников и предпринимателей РМ» работодателень региональнай объединениять председателец Виктор Бирюков.
Тяка жа шиня республикань Оцюнясь Артём Здунов форумть работанц пингста васетькшнесь «Трансмашхолдинг» АО-ть генеральнай директоронц Кирилл Липань, а сяльде— «Российская система качества» АНО-ть руководителенц Максим Протасовонь мархта.