Мордовиянь Оцюнясь Артём Здунов 27 июньцта ётафтозе «Монь Мордовиязе» экспертнай клубть заседаниянц, конань пингста тифтольхть итокт сообществать работань васенце кизонцты. Заседанияса примасть участия наблюдательнай советонь и «Монь Мордовиязе» экспертнай клубонь члеттне, наставникне.
Артём Здунов азозе, што «Монь Мордовиязе» экспертнай клубонь представительхнень мархта марстонь работась меля кандсь результатт.
«Петербургскяй международнай экономическяй форумса, кона ётафтовсь аф кунара, минь путоськ кяденьконь «Россиясь—возможностень страна» президентскяй платформать и республикать ёткса соглашениять алу. АНО-ть генеральнай директороц А.Г.Комиссаров отмечазе, што Мордовиясь сувси инголи молихнень ёткс од ломанень направлениять коряс: кирдемок мяльса кадровай проекттнень, должностьс путнематнень и инициативатнень эряфс ётафнемаснон. Эряви лядондомс инголи молихнень ёткса федеральнай уровеньца»,—пшкядсь региононь руководительсь клубонь члеттненди.
Работань васенце кизонь итокнень колга азондсь «Монь Мордовиязе» экспертнай клубть председателец Евгения Тулина. Кизоста сообществась тись-аноклась несколька социальнай проект, конатнень ёткса сяда содафокс арасть арт-кластерть тиемац, Саранскяйса велосипеднай инфраструктурать виияфнеманц концепцияц, IT-специалисттнень анокламасна и «Наставничество» проектть эряфс ётафтомац. Эряви азомс, 27 июньцта Россиянь Президентсь кемокстась 2023 кизоть Россияса Педагогонь и наставниконь кизокс азоманц колга Указ. Тя корхтай наставничествань форматть важнайшинц колга, мзярда профессионалхнень тевсна и содамошисна—тя лезкс оттненди од компетенциятнень тонафнемаса.
«Экспертнай клубсь примси участия федеральнай и республиканскяй грантовай конкурснень эса. «Монь Мордовиязень» кафта проектонза сувафтфт Стратегическяй инициативань Агентствать и Росконгрессонь Фондть «Сильные идеи для нового времени» форумснонды 1000 инь цебярь инициативатнень лувксс»,—азозе Евгения Тулина.
«Наставничество» проектонь участникокс кизоньберьф арась Мордовиянь 46 студент, конатнень лангса шефства вятсь 18 наставник. Улихть сатомшка оцю результатт—студенттнень 10 процентсна сатозь ни путф цельснон, 60 процентсь—поладсазь сотрудничендамать.
«Наставничество» проектть мяльса кирдезь оцю работа тиф сонь участниконзон региононь промышленнай отраслянь предприятиятнень мархта содафтоманксост. Мархтост стане жа аноклаф несколька марстонь проект, кемоксневихть договорхт целевойста тонафнеманди. Республикань Оцюнясь кирдезе мяльть ширенц улендемс предприятиятнень эса и мярьгсь сявомс тя направлениять башка контроль алу.
Мордовиянь Оцюнясь васедемать шумордамста поладозе, што Мордовияти Россиянь Президентть ширень кирдеманц пингста максфоль цебярьдонга цебярь возможность ётафтомс кадровай конкурсть, конань вельде регионца тифоль 10-да лама кадровай назначения. Сон шарфтозе «Монь Мордовиязе» экспертнай клубть мяленц бизнес-сообществать мархта марстонь тевонь вятемати.
Артём Здунов стане жа макссь казнет «Монь Мордовиязе» кадровай конкурсть ётафтомаса лезксонкса и эффективнай инициативнай проекттнень эряфс ётафтоманкса.