Дохоттне кассть, госшумось кирсь

14 июньцта Республикань Кудса ётафтовсь Мордовия Республикань сисемце созывонь Государственнай Собраниять колмогемонь сисемце сессияц. Сонь вятезе Госсобраниять Председателец Владимир Чибиркин. Сессиять работаса примась участия МР-нь Оцюнясь Артём Здунов.
Шинь повесткати сувафтфоль кеветие кизефкс. Васенцесь—Мордовия Республикань Правительствань Председательть васенце заместителенц должностьс Наталья Таркаевать путомац. Наталья Александровнань кандидатуранц тя вастти лихтезе Мордовиянь Оцюнясь. Депутаттне кирдезь сонь ширенц. Таркаевась кармай вятемонза Правительстваса финансово-экономическяй блокть.
Ванфоль «2023 кизонкса Мордовия Республикань республиканскяй бюджетть пяшкодеманц колга» Мордовия Республикань Законть проектоц. МР-нь финансонь министрть Сергей Тюркинонь валонзон коряс, региононь бюджетнай системать основной показателенза няфтсть касома. Республиканскяй бюджетть доходнай пяльксоц 2023 кизоня арась 62,7 миллиард цалковай, расходнайсь—63,1 миллиард цалковай. Налоговай и аф налоговай дохоттне арасть 43,4 миллиард цалковай, 2022 кизоть коряс касомась—5 процентт. Инь лама средствада нолдафоль социальнай сферати—34,4 миллиард цалковай (бюджетть карьхцензон 54,4 процентсна).
Ашесть кирьфтаф национальнай проекттнень эряфс ётафтомаснон темпонза. Тевс нолдаф 18,1 миллиард цалковай, тяконь лувксса тя суммать 70-да лама процентоц савсь «Безопасные качественные автомобильные дороги», «Жильё и городская среда», «Демография» проекттненди.
Сессиять пингста сувафтфтольхть полафткст «Мордовия Республикаса административнай комиссиятнень колга», «Мордовия Республикань нормативно-правовой акттнень обязательнай вешфксснон колга» и Мордовия Республикань лия кой-кона закоттненди.
Примаф «Об обращении Государственного Собрания Республики Мордовия к Председателю Правительства Российской Федерации Мишустину М.В. по вопросу совершенствования федерального законодательства в части увеличения продолжительности написания единого государственного экзамена на 1,5 часа для участников специальной военной операции» постановления. Законодательнай тя инициативать мархта лиссь Од ломанень Общественнай палатась.
Тяда башка, сессияса путфтольхть мировой судьят Старошайговскяй райононь и Дубёнскяй райононь судебнай участкатненди.
Ольга Евдокимова.