ЭРЬ КИЗЕФКСТИ—БАШКА МЯЛЬ

24 апрельста Саранскяйса, Республикань Кудса, ётафтовсь Мордовия Республикань сисемце созывонь Государственнай Собраниять нильгемонь кафксувоце сессияц. Сонь работасонза примась участия Мордовия Республикань Оцюнясь Артём Здунов.
Вятезе сессиять Мордовия Республикань Государственнай Собраниять Председателец Владимир Чибиркин.
Шинь повесткати сувафтфоль кемгафтува кизефкс. Сонь кемокстамдонза меле депутаттне кярьмодсть работати.
Васенце кизефкссь лемтьфоль республикань Государственнай Собраниянь депутатть Светлана Киселёвать полномочиянзон пингта инголе лоткафтомаснонды. Сотф тя сянь мархта, што Светлана Киселёва аф кунара тусь эряфста. Омбоце кизефксть ваномста азфоль: Бюджетть, финанснень и налокнень коряс комитетти председателькс тяни кармай республикань Госсобраниять Председателенц заместителец Сергей Вдовин.
Сяда тов депутаттне ванозь «Мордовия Республикань государственнай гражданскяй служащайхненди Мордовия Республикань государственнай гражданскяй службань класснай читтнень максомаснон и ванфтомаснон колга» Мордовия Республикань Законти приложенияти полафтксонь сувафтомать колга» Мордовия Республикань законть проектонц квалма кизефксть.
Башка мяль шарфтфоль «2025 кизонди и 2026 и 2027 кизотнень плановай периодснонды Мордовия Республикань республиканскяй бюджетть колга» Мордовия Республикань Законти полафтксонь сувафтомать квалма» Мордовия Республикань законть проектонцты.
Тянь коряс корхтась Мордовия Республикань финансонь министрсь Сергей Тюркин.
2025 кизонди бюджетть доходонзон объёмсна касфтф 2,1 миллиард цалковайда и ули, целайнек, 67 милиард цалковай. Карьхцнень объёмсна кассь 66,4 миллиард цалковайти молемс. Дополнительнай средстватне карьхцявихть социальнай ширень кирдемань тефненди, граждаттнень льготнай категорияснон лекарственнай препаратса обеспечендамаснонды, китнень петемаснонды, местнай бюджеттнень финансовай ширде ширень кирдемаснонды и лия эрявикс тевонди.
«Мордовия Республикаса культурать колга» Мордовия Республикань Законть 5 статьянцты полафтксонь сувафтомать квалма» Мордовия Республикань законть колга проектть ваномста тифтольхть полафткст тя Законти. Тяни мобилизациять коряс военнай службас сявфнень семьяснон аф совершеннолетняй членцнонды кармай макссевома 50 процентонь тии льгота республикань культурань организациятнень платнай мероприятияснонды якамста.
Сессияса кулхцонтфоль Мордовия Республикаса идть праванзон коряс Уполномоченнайть Наталья Юткинать 2024 кизонкса докладоц.
Ванфтольхть и лия кизефкст.
Сембе кизефкснень ваномдост меле сессиясь шумордазе эсь работанц.
Татьяна АЛЬШИНА.