Ётай недялять Саранскяйса, Республикань Кудса, ётафтовсь Мордовия Республикань сисемце созывонь Государственнай Собраниять нильгемонь сисемце сессияц. Работасонза примась участия Мордовия Республикань Оцюнясь Артём Здунов. Вятезе сессиять Мордовия Республикань Государственнай Собраниять Пердседателец Владимир Чибиркин.
Шинь повесткати сувафтфоль кемготува кизефкс. Сонь кемокстамдонза меле депутаттне кярьмодсть работати.
Васенце кизефкссь лемтьфоль «Мордовия Республикань Конституциять 98 статьязонза полафткснень сувафтомаснон колга» Мордовия Республикань законть проектонцты. Тя кизефксть коряс корхтась Мордовия Республикань Оцюнять и Мордовия Республикань Правительствать Администрацияснон Руководителец Булат Хайрутдинов. Булат Фирдинатович пачфтсь сянь колга, мезсь сотф республикань Государственнай Собранияв Мордовия Республикань Оцюнять мархта Мордовия Республикань Правительствать Председателенц кандидатуранц, а стане жа республикань Правительствать Председателенц васенце заместителензон и заместителензон кандидатураснон колга предложениятнень азомань пингснон кувалгофтомаснон квалма. Тяфтама полафткст сувафтфтольхть и «Мордовия Республикань Правительствать колга» Мордовия Республикань Законти.
Сессияса башка мяль шарфтфоль «Иттнень шачемста семьятнень государственнай эряма вастонь дополнительнай ширень кирдемаснон квалма» Мордовия Республикань законть проектонц мархта сотф кизефксти. Тя законть коряс латцеви правать вельде ули кода макссемс эряма вастонь помещеният наймонь договорхнень коряс рамамань права мархта. Корхтамась мольфтеви бюджетнай сферань работникнень, государственнай, муниципальнай служащайхнень колга, конат арайхть тядякс-алякс 2025 кизонь 1 ноябрьста сявомок 2027 кизонь 1 ноябрти молемс. Мирдти и рьвяти или аф пяшксе семьяста шабать родителенцты эряма Мордовияса, аф кизода кржас фалу работама регионца наймонь договорть тиемста. Стане жа эряви, штоба семьясь улель лувф эряма вастса нуждающайкс.
Ванфтольхть Мордовия Республикаса вирьхнень мархта сотф кизефксне. Корхтамась мольфтеви местнай самоуправлениянь оргаттнень муниципальнай собственностьса уликс вирень участкатнень мархта сотф полномочиятнень определенияснон колга.
Полафткст сувафтфтольхть и «Мордовия Республикань Государственнай Собраниянь комитеттнень и комиссиятнень колга» Мордовия Республикань Законти.
Сембе кизефкснень ваномдост меле сессиясь шумордазе эсь работанц.
Мрдамок иттнень шачемста семьятнень государственнай эряма вастонь дополнительнай ширень кирдемаснон мархта сотф примаф Законти азсаськ, што Мордовия Республикань Оцюнясь Артём Здунов сессияс пуромфненди мярьгсь: бюджетнай сферань работникт миньцонк аф сатнихть сембе вастова, сембода пяк райоттнень эса. Лама вий путови од программать виияфтоманцты, сонь эряфс ётафтоманцты бюджетста кармайхть нолявома дополнительнай ярмакт.
Массовай информациянь средствань представительхненди тя Законть коряс эсь мяльснон-арьсемаснон азозь республикань Государственнай Собраниять Председателец Владимир Чибиркин, сонь заместителец Наталья Долматова, республикань Государственнай Собраниянь депутатсь Виктория Богдашкина. Сембе синь шназь Законть, корхтасть сонь эрявиксшинц колга.
Татьяна Альшина.