22 августста Саранскяйса, Республикань Кудса, ётафтовсь Мордовия Республикань сисемце созывонь Государственнай Собраниять колмогемонь вейхксоце сессияц. Сонь вятезе МР-нь Госсобраниять Председателенц тевонзон тиендисна Наталья Долматова. Сессиять работаса примась участия Мордовиянь Оцюнясь Артём Здунов.
Шинь повесткати сувафтф кизефкснень (эздост ульсь кемонь) ваномда инголе Наталья Долматова макссь МР-нь Госсобраниянь депутутонь удостовереният Татьяна Волковати и Ксения Вотяковати. Мандаттне теест максфт Юрий Тутуковонь и Максим Автаевонь пингта инголе полномочияснон лоткафтоманкса. Татьяна Волкова кармай работама Социальнай политикать коряс комитетса, Ксения Вотякова—Бюджетть, финанснень и налокнень коряс комитетса.
Сессияса ванф кизефкснень ёткста васенцесь—«2024 кизонди и 2025 и 2026 кизонь плановай пингти Мордовия Республикань республиканскяй бюджетть колга» Законти полафткснень сувафтомасна. 2024 кизонди дохоттнень объёмсна касфтф 3,8 миллиард цалковайда налоговай и аф налоговай дохоттнень и безвозмезднай поступлениятнень вельде. Тянкса, кода пачфтезе МР-нь финансонь министрсь Сергей Тюркин, касфтовихть кой-кона социально значимай направлениятнень коряс карьхцне, тяконь лувксса: общай и дошкольнай образованиянь госучреждениятнень и муниципальнай учреждениятнень работникснонды трудснон инкса пандоманкса; льготнай лекарстваса граждаттнень обеспечендаманкса; СВО-нь участникненди выплатань пандоманкса; уроз и тядянь-алянь заботафтома лятф шабатнень эряма вастса обеспечендаманкса; аварийнай эряма вастста граждаттнень ётафтоманкса. Арьсеф населениять ширенц кирдемань од мера—фенилкетонурия урмаса сяряди шабатненди эрь ковонь пандомат.
Сяда тов сувафтфтольхть дополненият «Мордовия Республикань собственностть мархта управлениять и распоряжениять колга» Мордовия Республикань Законти, примафтольхть Мордовия Республикать и Рязанскяй областть ёткса границать пяльксонц согласовандаманц квалма договорхнень кемокстамаснон колга закоттненди.
Депутаттне кирдезь Мордовиянь Спортонь министерствать предложениянц ширенц—максомс государственнай физкультурно-оздоровительнай организациятнень эса услугатнень получамаса льготат СВО-нь участникнень лувксста боевой действиянь ветераттненди и синь семьянь членцнонды, а стане жа СВО-нь шавф участникнень семьянь членцнонды. Тянь колга полафткст сувафтфт «Мордовия Республикаса физическяй культурать и спортть колга» Законти.
«Правительственнай частть» пингста МР-нь экономикань, торговлянь и предпринимательствань министрсь Иван Горин пачфтезень депутаттненди и сессиянь участникненди 2024 кизоть васенце пяленц Мордовия Республикать социально-экономическяй виияфнеманц результатонзон. Азозе, што ВПР-сь мелянь тяка пингть коряс кассь 103 процентта, промышленнай производствань индекссь—111,7 процентта, велень хозяйстваса валовай продукциять объёмоц—113,5 процентта, основной капиталти инвестициятнень объёмсна—108,4 процентта.
Шинь повесткань кизефкснень ваномдост меле сессиясь шумордазе эсь работанц.
Ольга ЕВДОКИМОВА.