26 майста Мордовия Республикань Государственнай Собранияса ётафтовсть «Об исполнении республиканского бюджета Республики Мордовия за 2022 год» публичнай кулхцондомат. Пуромксса примасть участия Госсобраниянь депутаттне, Мордовиянь Правительствань и Счётнай палатань члеттне, прокуратурань покодихне, общественнай организациянь руководительхне и лият.
Кулхцондоматнень панжезень Госсобраниять Председателец Владимир Чибиркин. Сон мярьгсь, кле, эряви лац ваномс кода пяшкодевсь тяда ингольдень кизонь бюджетсь. Сяс мес тянь эзда ламода ащи региононь экономикать вииякшнемац и ломаттнень эряфснон цебярьгофнемац. Тя стама жа пяк эрявикс тев, кода и од кизонди бюджетть арьсемац.
Пуромксса доклад тись Мордовиянь финансонь министрть васенце заместителец Роман Антонов. Сон азозе, кодама ширетне республиканьконь экономикаса меля сяда кемокстасть, а конатненди шарфтома башка мяль. Министрть заместителец пачфтезе, што 2022 кизоня республикань бюджетть доходнай пяльксоц кассь 77,5 миллиард цалковайти, тяконь лувксса регионть сонцень доходонзон касомаснон вельде. Бюджетть пяледа ламоц ётай кизоня карьхцяфоль социальнай сферать лангс. Роман Антоновонь валонзон коряс, 2022 кизоня Мордовияса кассь средняй зарплатаське. Сон арась пцтай 39,5 тёжянь цалковай.
Отчётонц лувомда меле финансонь министрть заместителец отвечась залса пуромфнень кизефксснон лангс. Синь сотфтольхть «Культура» национальнай проектть эряфс ётафтоманц, здравоохранениянь системать финансированиянц, «Старшее поколение» региональнай проектть колга и стак тов. Владимир Чибиркин лувозень кизефкснень, конатнень кучезь республикань эряйхне публичнай кулхцондоматнень заочнай формаснон пингста. Кизефксонь максыхненди ответтне улихть прважафт. Тянь надияфтозе Госсобраниять Председателец.
Сяда тов вал максфоль экономическяй наукань докторти, профессорти Сергей Сорокинонди. Сон башка лоткась сянь лангс, кодама ситуациясь тячи странасонк, и сон, валонзон коряс, кирдема мяльса бюджетть мархта покодемстовок.
Госсобраниянь бюджетть, финанснень и налокнень коряс комитетть председателец Светлана Киселёва шарфтсь мяль сянь лангс, кода депутаттне пяшкотькшнесазь избирательхнень наказснон. Содавсь, што ётай кизоть тяфтамода пяшкотьфоль кемголмува. Пяшкодеманксост сембоц карьхцяфоль 611 миллион цалковай. Ётксост: райоттнень эса автомобильнай китнень, школатнень, больницятнень, культурань куттнень капитальнайста петемасна и лия кизефксне.
Марина СТЕШИНА.