Мордовиянь Государственнай Собранияса 30 июньцта максфтольхть сертификатт «Политическяй лидерствань школань» шумордайхненди. Тонафнемань тя проектсь мольфтевсь кафта кофт. Пингстонза од ломаттне-активисттне кулхцондсть лекцият, ванцть мастер-класст, вятсть дискуссият, васетькшнесть республикань депутаттнень, бизнесметтнень, общественнай деятельхнень и журналисттнень мархта. Синь тонафнесть ломань инголе корхтама, медиа-сфераса покодема, шарфнесть мяль сянь лангс, мезе веши тячиень политикать эзда эряфсь. Тя школаса пуроптф содамошитне лездыхть од ломаттненди сувамс регионть общественно-политическяй эряфозонза.
«Политическяй лидерствань школаста ули кода ушедомс карьера эрь стирти и цёрати. Сятненди, кинди аф сембе сяка, кода кармай эряма ванды сонь родной республикац. И региононц виияфтоманкса сон анок покодемс аф аньцек ськамонза, но и вятемс мельганза лиятненьге»,—азозе МР-нь Госсобраниять Председателенц заместителец Наталья Долматова сертификаттнень явомста. Сертификатт максфтольхть 13 ломаненди. Ётксост МР-нь Православнай од ломанень союзонь активистсь Григорий Белоключевский, М.Е. Евсевьевонь лемса МГПУ-нь студенткась Наталья Лазарева, Рузаевкаста гражданскяй активистсь Даниил Абрамов и лиятне. Наталья Владимировна эрть колга азсь пара валхт, арьсесь теест сатфкст сяда товонь покодемаса.
Тя проектсь пуроптозень марс активнай од ломаттнень. Кочкаф содамошиснон ули кода нолямс тевс, кепотьксонди, Од ломанень парламентть видеса. Наталья Долматова тага весть лятфтазе сембонди, што тяддень май ковста тя парламентсь сувась окружной Ассоциацияти и тяни сонь ули закононь азомань правац, мезсь кемокстаф республикать Конституциянцты тиф полафткснень эсовок.
13 активистти тифоль казне—тертьфтольхть экскурсияс Москуву, РФ-нь Государственнай Думав и Федеральнай Собраниянь Федерациянь Совету.
«Школа политического лидерства» проектть аноклазь Мордовиянь Госсобраниясь Од ломанень парламентть лезксонц вельде, «Единая Россия» партиять и «Молодая Гвардиять» региононь отделениясна. Школать аноклаенза кемайхть, што од активисттне, конат кафта кофт тонафнесть тяса, сяда товга кармайхть васетькшнема фкя-фкянь мархта, кирдема кеме соткст, аф ваномок сянь лангс, кона видетнень эса ушеды покодема эрсь эздост.
И.ФАДЕЕВА.