Мордовия Республикань Государственнай Собранияти—30 киза

25 апрельста Саранскяйса, И.М.Яушевонь лемса музыкальнай театраса, ётафтовсь торжественнай мероприятия, кона лемдевсь Мордовия Республикань Государственнай Собраниять 30 кизонь топодеманцты.
Региононь руководительсь Артём Здунов депутатскяй корпусть поздравляндамста лятфтазе: властень законодательнай органць пуропневсь стака кизотнень, странаса политическяй, экономическяй и социальнай полафткснень пингста. Но вийхнень марстоптомаснон вельде удалась тиемс эффективнай региональнай правовой база. «Тячи республикать эряфонь сембе ширензон эса Государственнай Собраниясь занци башка васта, сон—властень авторитетнай институт. Миньцонк кеме правовой ширесь, минь сявонттяма лангозонк сатомшка оцю социальнай обязательстват,—мярьгсь Артём Здунов.—Сюкпря сембонди, кие маштозь малаткшни кизефкснень решандамаснонды, сядонга пяк странати аф тёждя вызофнень пингста».
Тяфтама вызовкс арасть короновируснай инфекциясь, а сяльде—специальнай военнай операциясь. Синь няфтезь, конашкава важна улемс единай фронтокс, фкя командакс. «Эряфсь полафни, но минь ули кеме аралаеньке—законодательствась. Госсобраниянь сессиятнень эса примсихть участия муниципальнай образованиянь оцюнятне, министрхне, зампреттне, прокуратурань оргаттне, конат лисендихть законодательнай инициатива мархта. Сюкпря лац ладяф марстонь работанкса!»—мярьгсь Мордовиянь Оцюнясь.
Республикань руководительсь спасибась депутатскяй корпусти бюджетть пуропнеманцты профессиональнайста малаткшнеманкса, сядонга пяк ся условиятнень пингста, мзярда сашендовсь сяськондемс регионть шумонь оцю сталмонц.
«Историческяйкс арась 2022 кизось, мзярда Мордовиянь Госсобраниянь сембе фракциятне фкя мяльса кирдезь РФ-ть составс од региоттнень сувафтомаснон и частичнай мобилизациять колга странань Президентть решениянц,—азозе Мордовиянь Оцюнясь.—Тячи Государственнай Собраниянь эрь-кодама фракциянь представительхне марстонь вийса кирнесазь передовойса аляньконь-цёраньконь ширеснон, тиендихть кеме тыл Отечествань сембе аралайхненди, пуропнихть законодательнай база синь семьяснон ширеснон кирдеманкса. Ули кода азомс: республикань парламентсь аф аньцек законть вайгялец, но и историяньконь, коеньконь-обуцяньконь и питнишиньконь ванфтысна. Азан благодарностень валхт Госсобраниять руководстванцты, сембе депутаттненди патриотизманкса и шачема-касома масторти преданнайкс улеманкса».
ПФО-са Россиянь Президентть полномочнай представителенц Игорь Комаровонь лемста республикань законодательхнень поздравляндазень полпредть заместителец Олег Машковцев. «Мордовиянь Государственнай Собраниясь занци достойнай васта ПФО-нь законодательнай оргаттнень ёткса, активнайста участвовандай Приволжьянь законодательхнень Советснон работаса. Тинь азонкшнетяда инициативат, конат эрявикст марнек странать виияфнеманкса»,—мярьгсь сон.
Олег Машковцев шарфтсь мяль, што республикати удалась сяськомс аф простой ситуациять, мзярда регионть госшумоц ульсь кода сонь кизоньберьфонь кафта бюджетонза.
МР-нь Госсобраниять Председателец Владимир Чибиркин лятфтазе, што госшумоть инкса тевс нолдаф принуждениянь бюджетнай мерась ашезь макссе республикати касондомс-вииякшнемс. «Но странань Президентть ширень кирдеманц вельде республикань Оцюнясь и депутатскяй корпуссь примасть бюджетно-экономическяй сфераса кой-мзяра эсь лацонь мера. Кода результат тяддеть лама кизоста васенцеда республикась ушедозе коммерческяй шумофтома»,—азозе сон.
Республикань законодательхнень поздравляндазь Российскяй Федерациянь сенаторсь Пётр Тултаев, РФ-нь Государственнай Думань депутатсь Юлия Оглоблина, Мордовия Республикань прокурорсь Сергей Лапин, Саранскяй и Мордовскяй митрополитсь Зиновий.
Юлия Оглоблина азсь поздравлениянь валхт РФ-нь Госдумань Председательть Вячеслав Володинонь эзда.
Торжественнай мероприятияса максфтольхть государственнай казнет. Тяфта, МР-нь Государственнай Собраниять Председателец Владимир Чибиркин казьф «Мордовия Республикать виияфнеманцты личнай путксонкса» Мордовия Республикань Оцюнять Почётнай знаконц мархта.