24 майста Мордовиянь школатнень эса кайгсь мекольце пайгонясь. Республикань Госсобраниять Председателец Владимир Чибиркин тя шиня ульсь Краснослободскяйса, коса тонафнемань кизоть шумордаманц мархта поздравляндазень многопрофильнай лицеень и 1№ СОШ-нь коллектифнень. Тядде тяса 11-це классонь 50 выпускник, конатненди ушедови эряфонь од ки.
«Мекольце школьнай пайгонясь—тя идькс пингть мархта явома. Тинь ётаде кувака ки, уледе фкя командакс, фкя семьякс. Тяни эряви тиемс од аськолкс—тонафнемс профессия. Тинь эздонт ащи странать сай пингоц»,—мярьгсь Владимир Чибиркин.
Лама пара вал азфоль выпускникнень педагогснонды и тядяснонды-аляснонды, конат школаса тонафнемань сембе кизотнень ульсть шабатнень ваксса, лезнесть теест получсемс содамошит, ётафнемс эряфс маштомошиснон. И тонафтозь фкя инь васенцети—кельгомс шачема-касома масторснон.
«Инголе тинь ученттядязь аф аньцек сатфкст. Кармайхть и стакат-сталмот, конатнень сави сяськондемс. Аф пелезь моледа целентень сатомаснонды, трудендада эсь райононтень, Мордовиять и Россиять виияфнеманкса»,—пшкядсь Владимир Чибиркин школань шумордайхненди. Сон стане жа макссь казнет педагокненди профессиональнай трудонкса и од ломаттнень гражданско-патриотическяй и духовно-нравственнай воспитандамаснонды путксонкса. Арьсесь выпускникненди лац максомс экзаметтнень и поладомс тонафнемать вузса.