11 августста ётафтовсь сисемце созывонь Мордовия Республикань Государственнай Собраниять 51 сессияц. Эсонза примась участия Мордовия Республикань Оцюнясь Артём Здунов. Сессияса васенценди вановсь Мордовия Республикань Правительствань Председательть кандидатуранц коряс кизефкссь. Мордовия Республикань Оцюнясь Артём Здунов азозе МР-нь Правительствань Председателькс Батыр Эмеевонь кандидатуранц. Сон тяда инголе тиендезень Правительствань Председательть тевонзон. Кода азозе Государственнай Собраниять Председателец Владимир Чибиркин, Батыр Эмеев ломанць пяк ответственнай, машты ломаттнень мархта работама. Сонь руководстванц ала тиф лама цебярь тевда.
Эсь выступлениясонза Батыр Эмеев корхтась Мордовия Республикать сатфксонзон колга. Лятфтазень ся тефнень, конат эрявихть аделамс маластонь пингть. Сессияса корхтасть депутатскяй фракциянь оцюнятне, конат шназь Батыр Эмеевонь кандидатуранц. Сембе депутаттне максозь инксонза эсь вайгяльснон. Тяка жа шиня Мордовия Республикань Оцюнясь Артём Здунов сёрмадсь Правительствань од председательть путоманц колга Указ.
Сессияса тяфта жа ванондовсь Мордовия Республикаса питнефтома юридическяй лезксть макссеманц колга кизефкссь. Кулхцонтфоль Государственнай Собраниянь Законодательствань и законностень комитетсь. Тифтольхть полафткст МР-нь Законть колмоце статьязонза. Местнай самоуправлениянь, аграрнай, природопользованиянь и строительствань кизефкснень коряс комитеттне стане жа тисть полафткст МР-нь Законти.
Сессиять повесткас сувафтфоль «Мордовия Республикаса муниципальнай образованиянь представительнай оргаттненди депутатонь кочкамать» колга кизефкссь. Тифтольхть и лия полафткст Мордовия Республикань закононь проекттненди.
Сессияса ётафтфоль «Мордовия Республикань образовательнай учреждениятнень 2025-2026 тонафнема кизоти анокшиснон колга» лем ала Правительственнай част. Доклад тя кизефксть коряс тись МР-нь образованиянь министрсь Е.П.Солдатова. Сон пачфтезе, што тонафнемань учреждениятне анокт тонафнемань од кизоти. Синь отвечайхть тяниень пингть сембе вешфксонзонды.
Илья ВЕШКИН.