ПУРОМКШНЕСТЬ ОД ПАРЛАМЕНТАРИЙХНЕ

31 мартста Од ломанень республиканскяй центрать видеса ётафтовсь Од ломанень общественнай палатать тя кизонь васенце заседанияц. Эсонза примасть участия МР-нь Государственнай Собраниять Председателец Владимир Чибиркин, сонь заместителец Наталья Долматова.
Владимир Чибиркин шарфтозе од парламентарийхнень мяльснон малаткшни оцю илать—Великай Сяськомать 80 кизонь топодеманц праздновандаманцты. «Россияса аш семья, конань вакска ёталь войнась; эрть эса ванфнесазь геройснон колга мялямть. Тячи, кода аш мзярдовок, тейнек важна ванфтомс историческяй наследиять и пачфтемс сай поколениятненди ся пелькс событиятнень колга мялямть, касфтомок оттнень Родинати кельгозь»,—мярьгсь Мордовиянь Госсобраниять Председателец.
Од парламентарийхне азондсть мероприятиятнень колга, конат арьсефт ётафтомс Сяськомань шити. Синь ётксост «Александр Невский: Слава, Дух и Имя России», «СВОих не бросаем», «Сад памяти», «Окна Победы», «Георгиевская ленточка», «Свеча памяти», «Тест по истории Великой Отечественной войны» тонатф конкурсне и акциятне, а стане жа «Диктант Победы» Международнай акциясь.
Госсобраниянь депутатсь, Саранскяйса Культурнай инициативань Президентскяй фондть региональнай проектнай офисонц руководителец Ксения Вотякова содафтозень Од ломанень парламентонь члеттнень сянь мархта, кода ётафтомс эряфс проекттнень фондть конкурсонзон эса участиянь примамать вельде. Од ломанень парламентть председателенц заместителец Данил Ульянов азондсь «Воин» гражданско-патриотическяй центрать работанц колга. Од ломанень парламентть председателец Виктория Богдашкина пачфтсь СВО-нь участникненди, конат пчксихть или ётнихть реабилитация медучреждениятнень эса, веронь максомать коряс благотворительнай акциять ушедоманц квалма. Сон лемдеви Российскяй парламентаризмань шити и ётафтови 15 апрельста.