16 ноябрьста Саранскяйса Культурань республиканскяй Дворецса ётафтфоль Мордовия Республикань сисемце созывонь Государственнай Собраниять кемзисемгоце сессиянц келептьф заседанияц. Пингстонза Мордовия Республикань Оцюнясь А.А.Здунов пшкядсь Мордовия Республикань Государственнай Собранияти, республикань сембе эряйхненди эрь кизонь Посланиянц мархта.
Культурань республиканскяй Дворецу пуромкшнесь пцтай 1000 ломань. Оцюнять Посланиянц кулхцондыензон ётксотольхть Мордовия Республикань сисемце созывонь Государственнай Собраниянь депутаттне, Мордовиянь предприятиятнень и организациятнень руководительсна, министрхне, ошень и райононь оцюнятне, лиятне.
Панжезе и вятезе сессиять Мордовия Республикань Государственнай Собраниять Председателец В.В.Чибиркин, кона макссь вал Мордовия Республикань Оцюняти А.А.Здуновонди.
Тя шиня депутаттнень, производствань руководительхнень, культурань и образованиянь представительхнень, общественникнень мархта марса ванфтольхть специальнай военнай операциять колга кизефкссь, Мордовия Республикать касомань-вииямань кинза-янонза. Башка мяль шарфтфоль регионть экономиканцты и промышленностенцты.
Мордовия Республикань Оцюнясь А.А.Здунов Государственнай Собранияти Посланиянц ушедозе рузонь и эрзянь кяльса пшкядемаста.
«Мялезе корхтамс сянь колга, кода минь эрятама и работатама республикасонк, кодама цельхть и задачат ащихть инголенк. Корхтама карматама аф аньцек сатфкснень колга, но и сянь квалма, мезе эряви тиемс эряфоньконь цебярьгофтоманкса»,—мярьгсь республикань Оцюнясь.
Артём Алексеевич шарфтсь мяль сянди, што тядде минь няеськ ся событиятнень, конатнень эзда ламода ащесь обстановкась мирса и странаса. Тя специальнай военнай операциять ушедомац, частичнай мобилизациять ётафтомац, аф ялгафты странатнень санкциясна, странань региоттнень эса башка положениять сувафтомац.
Республикань Оцюнясь А.А.Здунов мярьгсь, што Мордовиясь фкя мяльса кирдезе странань Оцюнять внешняй рубешнень лангса соотечественниконьконь и странать араламанц колга решениянц. Тячи боецоньке сяда тов примайхть участия специальнай военнай операцияса, честь мархта пяшкотькшнемок воинонь долгснон. Ужяль, улихть юмафксоньке.
А.А.Здунов азсь мяль шавф воиттнень лятфтаманкса ащемс минута кашт аф молезь.
Республикань Оцюнясь азозе, што сяда товга кармай макссевома лезкс солдатоньконди и синь семьяснонды. Панчфт гуманитарнай лезксонь примамань пунктт, мольфтеви ярмаконь кочксемась. Тя тевса примайхть участия республикань ламоц предприятиятне, организациятне, эряйхне.
Посланияса А.А.Здунов пачфтезе, што Российскяй Федерациянь Президентть поручениянц коряс, Мордовияса работай экономикать стабилизациянц коряс Антикризиснай штабсь. Регионца эряфс ётафтови ни государственнай ширень кирдемань 100 лама мера. Вешендевихть од партнёрхт, сбытонь рынкат. Мольфтеви импортозамещениянь, омба масторонь поставщикнень отечественнайхнень лангс полафтомаснон мархта сотф кизефкснень коряс работа.
Мелянь декабрьста РФ-нь Президентть В.В.Путинонь поручениянц коряс примафоль республикать социально-экономическяй касоманц-виияманц программац. Сонь эряфс ётафтомац лезды тиемс 3000 рабочай од васта, касфтомс бюджетть собственнай доходонзон. Программати сувси «Лисма» заводть территориянц видеса республикаса индустриальнай васенце паркть тиемац, инновационнай социальнай инфраструктурать виияфтомац, эряфс ётафтови финансовай проекттнень ширеснон кирдемасна и стак тов. Васенда программать эряфс ётафтоманкса арьсефоль карьхцямс федеральнай бюджетста 5 миллиартт цалковай. Россиянь Правительствать ширень кирдеманц вельде тядде финансированиянь объёмсь касфтфоль 7 миллиартт цалковайти, мезть вельде дополнительнайста ули кода строямс теплосеть и одкстоптомс пассажирскяй транспортонь паркть.
Мордовия Республикань Оцюнясь Посланиясонза корхтась странать обороноспособностенц кемокстаманц и тя тевонди ноляви средстватнень колга. Гособоронзаказть пяшкотькшнема педа-пес. Эрь ломанти содама кода вятема пряц чрезвычайнай ситуациять пингста.
«Госзаказть касоманц мархта сотф тячиень ситуациясь тисыне предприятияньконди объёмтнень касомаснон условияснон. Тяса эряви занямс эсь вастце. Шумордама ОПК-нь инь оцю концернатнень вешфксснон анализснон»,—мярьгсь А.А.Здунов.
Военнослужащайхнень вешфксснон пяшкодеманкса кой-кона компаниятне сявсть эрявикс ориентир продукциянь нолямаса. Кепотьксонди, лёгкай промышленностть мяльса кирдезь, Мордовияса ладяф утцемань кяскавонь и термобельёнь, бронежилетонь, разгрузкань и лия эрявиксть нолямац. Лёгкай промышленностень тяфтама предприятиятне тячиень шить заняфт тевса сяда процентс.
Азфоль, што ули кода касфтомс поставкань объёмтнень Россиянь од региоттнень вешфксснон коряс. Ня территориятнень одукс кеподемаснон инкса эряви пяк лама строительнай материал. Мордовиянь 13 предприятиясь сувафтф ни Россиянь Строительствань и жилищно-коммунальнай хозяйствань министерствать эрявикс реесторозонза.
2012 кизоста сявомок Мордовияса ётафтови эряфс «Земский доктор» программась. Сонь мяльса кирдезь, аноклаф аф кржа специалист, конатнень эзда ламотне пяшкодезь эсь обязательстваснон. Вете кизонь контрактть шумордамдонза меле ламотне ляткшнихть работама республикань здравоохраненияса, но аф вели. Сяс тя программать коряс од кадратнень вешендемаснонды шарфтома башка мяль.
Республикань Госсобранияти Посланияса кепотьфоль образованиять, культурать, экономикать мархта сотф аф кржа кизефкс. Тифтольхть итокт сатфти, путфтольхть задачат эряенди. И путф задачатнень пяшкодеманкса работама марстонь вийса, виень аф ужяльдезь.
Т.АЛЬШИНА.