Республикать бюджетоц примаф

15 декабрьста Саранскяйса, Мордовия Республикань Государственнай Собранияса, ётафтовсь Мордовия Республикань сисемце созывонь Государственнай Собраниять колмогемонь фкиеце сессияц.
Эсонза примасть участия Мордовия Республикань Оцюнясь Артём Здунов, республикань Государственнай Собраниянь депутаттне, республикань Правительствань члеттне, властень исполнительнай органонь и местнай самоуправлениянь органонь представительхне.
Вятезе сессиять Мордовия Республикань Государственнай Собраниять Председателенц тевонзон тиендисна Наталья Долматова. Шинь повесткать, конанди сувсесь 12 кизефкс, кемокстамдонза меле депутаттне кярьмодсть работати.
Васенце кизефкссь лемтьфоль «2023 кизонди и 2024 и 2025 кизотнень плановай периодснонды Мордовия Республикань республиканскяй бюджетть колга» Мордовия Республикань Законти полафтксонь сувафтомать колга» Мордовия Республикань Законть проектонцты. Тяфта, сувафтовихть полафткст, сявомок мяльс налоговай и аф налоговай дохоттнень, а нинге межбюджетнай лия трансферттнень. 2023 кизонди дохоттнень объёмсна касы 607,5 миллион цалковайда. Тяконь лувкссна, средстватне арьсекшневихть нолдамс автомобильнай китнень капитальнайста петемаснонды, общай и дошкольнай образованиянь муниципальнай учреждениянь работникненди трудонкса пандоманди, транспортнай и жилищно-коммунальнай комплексонь отраслятнень ширеснон кирдемаснонды.
Сяда тов ванфоль «2023 кизонди и 2024 и 2025 кизотнень плановай периодснонды Мордовия Республикань обязательнай медицинскяй страхованиянь Территориальнай фондть бюджетонц колга» Мордовия Республикань Законти полафтксонь сувафтомать квалма» Мордовия Республикань Законть проектонц колга кизефкссь. Тя законти стане жа сувафтфтольхть полафткст.
Башка мяль шарфтфоль шинь повесткать колмоце кизефксонцты—«2024 кизонди и 2025 и 2026 кизотнень плановай периодснонды Мордовия Республикань республиканскяй бюджетть колга» Мордовия Республикань Законть проектонцты. Сонь арьсемстонза мяльс сявфтольхть Мордовиять социально-экономическяй касоманц-виияманц прогнозонц инь оцю ширенза.
Мордовия Республикань бюджетсь, кона арьсеф 2024 кизонди и 2025 и 2026 кизотнень плановай периодснонды, примафоль республикань сисемце созывонь Государственнай Собраниять колмогемонь фкиеце сессиясонза.
Сяда тов ванфтольхть шинь повесткати сувафтф и лия кизефксне. Ётксост «Организациятнень прибыльснон лангс налогть коряс ставкатнень кирьфтамасна» Мордовия Республикань Законть 1 статьязонза полафтксонь сувафтомать колга» Мордовия Республикань Законть проектонц колга, «Мордовия Республикаса мешень кирдемать колга» Мордовия Республикань Законть проектонц колга и лия кизефксне.
Сессиять шумордамста Наталья Долматова пачфтсь 2023 кизоня Государственнай Собраниять работань итогонзон колга.
Тянь мархта сессиясь шумордазе эсь работанц.
Тя шиня республикань Госсобраниянь кой-кона депутаттне примасть участия «Ёлка желаний» Всероссийскяй акцияса. Синь кузста керсть шар лаца открыткат, конатнень лангс тяштьфоль мезень колга арьсихть иттне.
Татьяна Владимирова.