24 ноябрьста Саранскяйса ётафтовсь Мордовия Республикань Государственнай Собраниять колмогемонце сессиянц омбоце заседанияц. Заседанияса примась участия республикань Оцюнясь Артём Здунов.
Сессияса депутаттне ванцть 18 кизефкс. Васенцекс синь сувафтсть полафткст налогонь пандомать коряс Мордовия Республикань башка закоттненди, конат тифт республикань Правительствать инициативанц коряс.
Сяльде депутаттне сувафтсть полафткст «Уроз иттненди и шабатненди, конат лядсть тядянь-алянь заботафтома, социальнай ширень кирдемань максомань дополнительнай мератнень колга» республикань Законти. Ня полафтксне сувафтфт Мордовия Республикань прокурорть Сергей Лапинонь инициативанц коряс.
Сяда тов депутаттне сувафтсть полафткст референдумонь, кочкамань ётафтоматнень и «Мордовия Республикань Избирательнай комиссиять колга» Закоттненди.
Депутаттне фкя мяльса кемокстазь «Федеральнай законодательстваса абортонь пропагандать каршес кардамать коряс Мордовия Республикань Государственнай Собраниять пшкядеманц Россиянь Государственнай Думань Председательти В.В.Володинонди и Правительствань Председательти М.В.Мишустинонди», а тяфта жа «Рязанскяй областной Думать пшкядеманц ширень кирдеманц колга» Мордовия Республикань Государственнай Собраниять постановлениянц.
Владимир НЕСТЕРОВ.