30 майста Саранскяйса, Республикань Кудса, ётафтовсь Мордовия Республикань сисемце созывонь Государственнай Собраниять колмогемонь котувоце сессияц. Сонь вятезе Госсобраниять Председателец Владимир Чибиркин.
Шинь повесткати сувафтфтольхть 10 кизефкст.
Сувафтфт полафткст «2024 кизонди и 2025 и 2026 кизотнень плановай пингснонды обязательнай медицинскяй страхованиянь Территориальнай фондть бюджетонц колга» Мордовия Республикань Законти. Тя сотф 2024 кизонь 1 январть самс межбюджетнай трансферхнень тевс апак нолдак лятксснон Федеральнай фондть бюджетозонза мрдафтомаснон, а стане жа тядде межбюджетнай трансферхнень и аф налоговай дохоттнень вельде бюджетти дополнительнай поступлениятнень мархта.
Тяда башка, сувафтфт полафткст «Мордовия Республикаса эряй населениянь башка категориятненди социальнай ширень кирдемань мератнень колга» Мордовия Республикань Законти. Сай кизонь 1 январьста сявомок лама идень семьятненди ладяви эрь ковонь ярмаконь компенсация—теест мрдафтови эряма вастть инкса пандомань карьхцнень 30 процентсна.
Сессияса выступления тись МР-нь прокурорсь Сергей Лапин. Сон пачфтсь сянь колга, што ладяви административнай ответственность тядятнень-алятнень лангс, кда синь кадсазь шабаснон мельгаст апак ватт ведень объекттнень маласа, а стане жа должностной и юридическяй лицатнень лангс ведьса аралафшить аф сатомшка лац обеспечендаманкса.
Мордовиянь энергетикань и жилищно-коммунальнай хозяйствань министрсь Александр Голянин азондсь лама квартирань куттнень эса марстонь имуществать капитальнайста петемань программать результатонзон колга. Тяниень пингти программати сувафтфт лама квартирань куттнень пялесна. Тифт эрь-кодама работат, мезенкса карьхцяф 7 миллиартт цалковай. Кода пачфтезе министрсь, тядде петемань работат кармайхть вятевома 244 кудса, ули карьхцяф 905,7 миллион цалковай.
Сессиять пингста кемокстафоль Мордовия Республикань Общественнай палатать од составонц колмоцекс пяльксоц. Эзонза сувасть национально-культурнай, спортивнай, правозащитнай и лия аф коммерческяй организациянь, СМИ-нь представительхть.
Меколи кемокстафоль Торбеевскяй райононь мировой судья. Тя вастть занязе Светлана Замотаева.
О нас
«Мокшень правда — одна из старейших газет России, она основана в 1921 году. Это единственная газета в стране и мире, выходящая на мордовском-мокша языке.
Архив новостей
Контакты
Главный редактор - 24-57-73
Заместитель редактора - 24-42-51
Ответственный секретарь-24-57-03
Бухгалтерия - 24-42-68
E-mail: mokshenpr@e-mordovia.ru
Социальные сети
© 2022 "МОКШЕНЬ ПРАВДА". ВСЕ ПРАВА ЗАЩИЩЕНЫ. 16+