2 октябрьста Республикань Кудса ётафтовсь Мордовия Республикань сисемце созывонь Государственнай Собраниять нильгемонце сессияц. Сонь вятезе Госсобраниять Председателец Владимир Чибиркин. Сессияса примасть участия региональнай Правительствань члеттне, властень исполнительнай оргаттнень и местнай самоуправлениянь оргаттнень представительсна.
Шинь повесткати сувафтфоль 16 кизефкс.
Сессиять ушедомста Владимир Чибиркин казезе Мордовия Республикань III степенень Славань орденца МР-нь сисем созывонь Госсобраниянь депутатть, Торбеевань мясной и молочнай промышленностень колледжень ингольдень директорть Юрий Тутуковонь (куломдонза меле). Казнесь максфоль удаванцты.
Сяда тов ванфтольхть кизефксне. Тяфта, сессиять пингста сувафтфтольхть полафткст «О государственном регулировании розничного оборота алкогольной продукции на территории Республики Мордовия» законть 7-це статьязонза. Ня полафткснень мяльсь сявозь аф мярьгондеви мишендемс сяпиня общепитонь заведениятнень эса (ресторанда башка), конат ащихть лама квартирань куттнень эса, 23 частста сявомок 9 частти молемс.
Мордовиянь прокурорть инициативанц коряс ладяви административнай ответственность граждаттненди, должностной и юридическяй лицатненди муниципальнай райоттнень антитеррористическяй комиссияснон решенияснон аф пяшкотькшнеманкса или колсеманкса. Тянь коряс полафткст сувафтовсть «Об административной ответственности на территории Республики Мордовия» законти.
Киртьфоль МР-нь Госсобраниянь Социальнай кизефкснень коряс комитетть инициативанц ширец—касфтомс эрь ковонь ярмаконь пандоматнень лицатненди, конат работасть тылса Великай Отечественнай войнать пингста. Сявомок мяльс «О мерах социальной поддержки отдельных категорий населения, проживающих в Республике Мордовия», законти сувафтф полафткснень, пандомать размероц арай 864,9 цалковай.
Сувафтфт полафткст «О межбюджетных отношениях в Республике Мордовия» Мордовия Республикань законть 15-це статьязонза. Синь сотфт директорхнень воспитаниять коряс советникснонды эрь ковонь ярмаконь вознаграждениянь обеспечендаманкса межбюджетнай трансфертонь максомать коряс расходнай обязательстватнень ладямаснон мархта.
Стане жа сувафтфтольхть полафткст «О государственной поддержке инвестиционной деятельности в Республике Мордовия», «О снижении ставок по налогу на прибыль организаций», «О патентной системе налогообложения на территории Республики Мордовия» и Мордовия Республикань кой-кона лия закоттненди.
Ольга Евдокимова.