СУВАФТФТ ПОЛАФТКСТ КОЙ-КОНА ЗАКОТТНЕНДИ

27 майста Республикань Кудса Владимир Чибиркинонь председательстванц ала ётафтовсь Мордовия Республикань сисемце созывонь Государственнай Собраниять нильгемонь вейхксоце сессияц. Работасонза примасть участия Мордовиянь Оцюнясь Артём Здунов, региональнай Правительствать, МР-нь Оцюнять и МР-нь Правительствать Администрацияснон членцна, министерствань руководительхне, муниципальнай райоттнень оцюнясна.
Заседаниясь ушедовсь Ольга Каниськинати МР-нь Госсобраниянь депутатонь удостоверениять и мяштьса каннемань знакть максомастост. Сон кармай покодема Местнай самоуправлениянь кизефкснень коряс комитетть составса.
Сембоц сессияса ванфоль 15 кизефкс.
Примафтольхть 2024 кизонкса республиканскяй бюджетть и Обязательнай медицинскяй страхованиянь территориальнай фондть бюджетонц пяшкотькшнемаснон колга закоттне.
Регионть бюджетоц ульсь профицит мархта: дохоттнень коряс пяшкотьф 73,2 миллиард цалковаень объёмса, карьхцнень коряс—71,3 миллиард цалковаень объёмса. Госсобраниянь сембе фракциятне кирдезь законопроекттнень ширеснон.
Сувафтфт полафткст «О вознаграждении опекунам и попечителям несовершеннолетних граждан в Республике Мордовия» МР-нь Законть 1-це статьязонза. Тяни приёмнай тядятне-алятне получайхть 7400 цалковаень лувксса выплата, а приёмнай шабань, конанди ашесть топоде колма кизот, шабань-инвалидонь или шумбрашинь ограниченнай возможность мархта идень воспитандаманкса доплатась арай 2500 цалковай.
Тяда башка, од законть мяльс сявозь, курок регионцонк кармай отмечсевома Лама идень семьянь ши. Илась ладяф 30 сентябрти.
Сувафтфт полафткст «О порядке предоставления в Республике Мордовия земельных участков участникам специальнай военной операции и членам их семей» и «О регулировании земельных отношений на территории Республики Мордовия» закоттненди.
Сессиять пингста кемокстафоль МР-нь Госсобраниянь депутатонь кочкаманди одномандатнай избирательнай окрукнень схемасна.
Стане жа заседанияса киртьфоль мировой судьянь должносттненди кемокстамать ширец.