10 октябрьста Саранскяйса ётафтовсь Мордовия Республикань сисемце созывонь Государственнай Собраниять комсь кафксувоце сессияц. Вятезе сонь Госсобраниять Председателец Владимир Чибиркин. Сембоц ванфоль 21 кизефкс.
Сессияса примась участия Мордовия Республикань Оцюнясь Артём Здунов.
Заседаниять ушедомста Владимир Чибиркин максозе депутатонь удостоверениять и знакть Дмитрий Глушконди, кона кочкафоль республикань Госсобраниянь депутатокс «Единая Россия» партиять эзда дополнительнай кочкаматнень пингста 16№ Луховскяй одномандатнай округса.
Сяльде депутаттне сувафтсть полафткст «Мордовия Республикать территорияса административнай ответственностть колга» Законти. Пинень азорхненди ладяф ответственность, кда пинесь ласьконди или вятневи намордникфтома и поводокфтома социальнай объекттнень эзга.
Тяфта жа сувафтфт полафткст «Мордовия Республикать территорияса модань отношениятнень регулировандамаснон колга», «Мордовия Республикаса семьятненди, конатнень улихть идьсна, дополнительнай лезксонь максомать колга», «Мордовия Республикаса питнефтома юридическяй лезксонь максомать колга» и лия Закоттненди.
Сяда тов депутаттне максозь вайгяльснон Мордовия Республикань мировой судьятнень инкса. Лямбирскяй райононь 1№ судебнай участкань мировой судьякс путф-кемокстаф Роман Дерябин, Саранскяень Октябрьскяй райононь 3№ судебнай участкань мировой судьять тевонзон тиендикс путф-кемокстаф Ираида Копасова.
Депутаттне стане жа сувафтсть полафткст Мордовия Республикань Государственнай Собраниять видеса Од ломанень парламентть персональнай составозонза.
Владимир НЕСТЕРОВ.