31 октябрьста Республикань Кудса ётафтовсь Мордовия Республикань сисемце созывонь Государственнай Собраниять нильгемонь фкиеце сессияц. Вятезе сонь Госсобраниять Председателец Владимир Чибиркин. Сессиять работаса примась участия МР-нь Оцюнясь Артём Здунов.
Депутаттненди ваномс лихтьфоль 15 кизефкс.
Сувафтфт полафткст «2024 кизонди и 2025 и 2026 кизонь плановай пингти Мордовия Республикань бюджетть колга» законти. 2024 кизонди бюджетть доходнай пяльксоц арась 65,4 миллиард цалковай, расходнайсь—67,5 миллиард цалковай. Касфтовихть кинь строямань-петемань тефненди, граждаттненди социальнай ширень кирдемань мерань максоманди, государственнай учреждениятнень кирдемаснонды, местнай бюджеттнень ширеснон кирдеманцты, гражданонь льготнай категориятнень лекарственнай препаратса обеспечендамаснонды карьхцне.
«Мордовияса эряй населениянь башка категориятненди социальнай ширень кирдемань мератнень колга» Мордовия Республикань Законти сувафтф полафткснень мяльс сявозь ладяви ярмаконь единовременнай пандома 25 кизода од аватненди, конат шачфтозь васенце идьснон. Пандомать суммац—100 тёжянь цалковай. Получаманксонза улихть кой-кодама условият: авать ули российскяй гражданствац, сон эряй Мордовияса аф колма кизода кржа пинге, апак сяфт родителень праванза.
Сувафтфт полафткст кой-кона закоттненди, конат сотфт населениянь башка категориятненди социальнай ширень кирдемань мератнень ладямаснон мархта. Тяфта, Мордовия Республикань Славань орденца казьф (куломда меле) лицать удаванцты (авафтома аляти) кармай эряфоньберьф пандовома эрь ковонь пособия: 29000 цалковай, кда казьф I степенень Славань орденца; 2500 цалковай—II степенень Славань орденца; 1500 цалковай—III степенень Славань орденца.
СВО-нь участникненди социальнай лезксонь максоманкса сувафтфт полафткст земельнай отношениянь сфераса Мордовия Республикань башка закоттненди. Специальнай военнай операциянь участникненди, конатненди максф «Россиянь Герой» лемсь или конат казьфт РФ-нь ордеттнень мархта, ули кода ётафтомс эряфс собственностезост питнефтома модань участкань получаманди праваснон специальнай военнай операцияса улемстост (отпускса улемстост).
Депутаттне кемокстазь 2025 кизонди избирательхнень наказснон коряс предложениятнень, ётксост автомобильнай кинь, социально-культурнай назначениянь и жилищно-коммунальнай хозяйствань объектонь строямась и петемась.
«Правительственнай часть» рамкаса ванфтольхть тяддень кизонь пингть шабатнень ваймосемаснон и шумбрашиснон кемокснеманц мархта сотф кизефксне. Тянь колга пачфтсть МР-нь образованиянь министрсь Елена Солдатова, Роспотребнадзоронь региональнай Управлениять руководителец Наталья Фадеева, Мордовиянь вуснень Ректоронь советснон видеса воспитательнай работать коряс советть председателец Александр Астафьев.
Сессиять шумордамста Госсобраниять Председателец Владимир Чибиркин серьгядезень депутаттнень сяда тов кирнемс специальнай военнай операциянь участникнень и синь семьяснон ширеснон. «Ламотне эздонт системнайста работайхть тя ширеса, макссихть финансовай, информационнай, благотворительнай лезкс. Эрь депутатти тя гражданскяй долг и важнай обязанность. Тя работась мольфтема специальнай военнай операциять целензон сатомс—сяськомозонк»,—мярьгсь Владимир Чибиркин.