СВО-нь участникне и синь семьянь членцна аф кармайхть паннема транспортнай налог

28 октябрьста ётафтовсь Мордовия Республикань сисемце созывонь Государственнай Собраниять кемготувоце сессияц. Сонь работасонза примасть участия Мордовиянь Оцюнясь Артём Здунов и МР-нь Правительствать Председателец Владимир Сидоров.

МР-нь Госсобраниять Председателец Владимир Чибиркин содафтозень пуромфнень Мордовиянь од прокурорть Сергей Лапинонь мархта, кона путф тя должностти 2022 кизонь 11 октябрьста Россиянь Президентть Указонц коряс.
Пшкядемок депутаттненди, спикерсь азозе, што странати инь таколфты кизефксокс тяни ащи частичнай мобилизациять коряс мероприятиятнень ётафтомасна. Минь республикасонк Мордовиянь Оцюнять и региональнай Правительствать, трудовой коллектифнень, сембе уровенень депутаттнень, волонтёрскяй, общественнай организациятнень и ломаттнень вийсна водендафт кеме тылонь тиендемати, специальнай военнай операциянь участникненди и синь семьянь членцнонды лезксонь максомати.
Владимир Чибиркин шарфтсь мяль сянди, што Мордовиянь Госсобраниянь ламоц депутаттне макссихть сатомшка оцю лезкс военнослужащайхненди: обеспечендакшнесазь экипировкаса, медикаментса, макссихть материальнай лезкс. Спикерсь кошардсь мольфтемс тя работать сяда товга. Тяка пингть, сялтфтольхть кой-кона депутаттне, конат формальнайста малаткшнихть лезксонь максомати.
«Нолямс тянь аш кода. Минь аш моральнай праваньке ащекшнемс ширеса и ваномс, кода лиятне пяшкотькшнесазь путф задачатнень. Тейнек эряви улемс кепотьксокс ломаттненди, минь кочкаеньконди тя работаса. Эряви лезнемс, штоба афоль уле визькс ваномс ломаттнень и фкя-фкянь сельмос»,—азозе Мордовиянь Госсобраниять Председателец.
Сессияса сувафтфтольхть полафткст «2022 кизонди и 2023 и 2024 кизотнень плановай пингснонды Мордовия Республикань республиканскяй бюджетть колга» МР-нь Законти. Бюджетть доходнай пяльксоц касфтф 1 миллиард 430 миллион цалковайда, карьхцне—2 миллиартт 170 миллион цалковайда. Дополнительнай средстват улихть нолдафт граждаттненди социальнай ширень кирдемань мератненди, национальнай проекттнень эряфс ётафтомаснонды, ЖКХ-са, кинь строямаса, велень хозяйстваса и лия сфератнень эса кизефксонь решандамати.
Эрявикс полафткст сувафтфт «Транспортнай налогть колга» МР-нь Законть 4 статьязонза. Одкстоптф документсь нолясыне транспортнай налогть пандоманц эзда ломаттнень, конат участвондайхть специальнай военнай операциять эса и синь семьянь членцнон (рьваснон, мирдьснон, аф совершеннолетняй идьснон, 23 кизонь топодемс шабаснон, конат тонафнихть образовательнай организацияса тонафнемань очнай формас коре).
Кода мярьгсь МР-нь финансонь министрсь Сергей Тюркин, налоговай льготась максови 2021, 2022 и 2023 кизотненди легковой автомобильхнень лангс, конатнень двигательснон мощностец 200 алашань вийс молемс. Кда вяре азф лицатнень лангс регистрировандафт кафта и сяда лама автомобильхть, эста льготась максови инь оцю мощность мархта транспортнай средствать лангс.
Тяда башка, кемокстафт 2023 кизонди избирательхнень наказснон коряс предложениятне. Арьсеф тефнень лувксс сувафтфт Ардатова ошса канализационнай сетьтнень реконструкциясна, Кадошкино посёлкаса паркть реконструкцияц, Ковылкинскяй райононь Порапа велеса идень площадкатнень строямасна, Оцю Игнатова велеса ваймосемань вастть тиемац. Сембе ня объекттне кармайхть кирдевома депутатскяй контроль ала.
Киртьфт федеральнай закоттнень проектснон ширесна, конат водендафт традиционнай питнишитнень араламаснонды, аф традиционнай сексуальнай отношениятнень пропагандаснон аф нолдамаснонды. Мордовиянь Госсобраниять Председателенц заместителец, «Единая Россия» партиянь фракциять руководителец Наталья Долматова азозе, што Россиять каршес ушетф информационнай войнась водендаф семейнай питнишитнень срафтомаснонды, поколениятнень ёткса соткснень сяземаснонды, од ломаттненди тяряфневи вихца тонгомс идеалхнень, конат аф малат российскяй народти и сонь культуранцты, духовнай питнишинзонды.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...