4 сентябрьста Саранскяйса, Мордовия Республикань Государственнай Собранияса, ётафтовсь Мордовия Республикань сисемце созывонь Государственнай Собраниять комсь сисемце сессияц.
Эсонза примась участия Мордовия Республикань Оцюнясь Артём Здунов. Вятезе сессиять Мордовия Республикань Государственнай Собраниять Председателец Владимир Чибиркин.
Шинь повесткать кемокстамдонза меле депутаттне кярьмодсть работати. Сембоц ванфтольхть 9 кизефкст.
Мордовия Республикань закоттнень проектснон ваномста, республикань Государственнай Собраниянь депутаттне примасть закон, конань вельде тяни ули кода сяда келиста нолямс тевс тядянь республиканскяй капиталть—рамсемс миньцонк нолдаф автотранспортнай средстват. Корхтамась мольфтеви 200 алашань вийхненди молемс мощностень лёгковой автомобильть или тяка вийса автобусть колга.
Мордовияса 1 июльста тяни кармай улема Боевой действиянь ветераттнень шисна. Сон ладяф «Мордовия Республикаса Боевой действиянь ветераттнень шиснон ладяманц колга» Мордовия Республикань законть проектонц ваномста.
Сессияса ванфтольхть и Мордовия Республикань мировой судьятнень должностьс ладямать колга, «Мордовия Республикань муниципальнай образованиятнень бюджетснон кемокстамаснон эсь лацонь ширеснон квалма» и лия кизефксне.
Меколи ульсть Правительственнай кафта частт. Васенцеть пингста Мордовия Республикань экономикань, торговлянь и предпринимательствань министрть тевонзон тиендисна Иван Горин пачфтсь 2023 кизоть васенце пялестонза Мордовия Республикать социально-экономическяй касомань-вииямань итогонзон колга.
Омбоце Правительственнай частсь лемтьфоль Мордовия Республикань образовательнай организациятнень тонафнемань од кизоти аноклафокс улемаснонды. Тянь квалма пачфтсь Мордовия Республикань образованиянь министрсь Елена Солдатова.
Шинь повесткати сувафтф сембе кизефкснень ваномдост меле, Госсобраниять Председателец Владимир Чибиркин пачфтсь сянь колга, кода депутатскяй корпуссь лезни специальнай военнай операциянь участникненди.
Тянь мархта сессиясь шумордазе эсь работанц.
Татьяна АЛЬШИНА.