ВАНФТОЛЬХТЬ ЭРЯВИКС КИЗЕФКСТ

23 июльста Саранскяйса, Республикань Кудть конференц-залсонза, ётафтовсь Мордовия Республикань сисемце созывонь Государственнай Собраниять 38-це сессияц.
Работасонза примасть участия Мордовия Республикань Оцюнясь Артём Здунов, республикань Государственнай Собраниянь депутаттне, республикань Правительствань члеттне, республикань муниципальнай райононь оцюнятне, официальнай лия ломатть. Вятезе сессиять Мордовия Республикань Государственнай Собраниять Председателец Владимир Чибиркин.
Шинь повесткать кемокстамдонза меле депутаттне кярьмодсть работати.
Васенцекс ванфоль Мордовия Республикань Государственнай Собраниянь депутаттнень Юрий Тутуковонь и Максим Автаевонь полномочияснон пингта инголе лоткафтомаснон колга кизефкссь. Юрий Тутуков тяддень 10 июльста тусь эряфста. Максим Автаев сонць эняльдсь лоткафтомс депутатонь полномочиянзон. Кизефксть тянь колга сессияса ваномс лихтезе республикань Государственнай Собраниянь Советсь.
Ванфоль и «Мордовия Республикань Конституциять 71 статьязонза полафтксонь сувафтомать колга» Мордовия Республикань Законть проектоц. Тя кизефксть сессияса ваномс лихтезе Мордовия Республикань Оцюнясь, головной комитетсь—Законодательствать и законностть коряс комитетсь. Азфоль, што Мордовия Республикань Оцюнять полномочиянза лоткафтовихть пингта инголе, кда сонь эвондай иностраннай агентонь статусоц.
Полафткст сувафтфтольхть «Мордовия Республикань государственнай службать колга» Мордовия Республикань Законть 20 статьязонза. Сотфт синь государственнай служащайхнень пенсияса обеспечендамать кой-кона ширензон мархта.
«Организациятнень имуществаснон лангс налогть колга» Мордовия Республикань Законть 3 статьязонза полафткснень сувафтомаснон квалма, тя налогсь аф кармай панфтовома Мордовиянь Здравоохранениянь министерствати канневи здравоохранениянь госучреждениятнень кядьста.
Республикань Госсобраниять 38-це сессиясонза ванф кизефкснень ёткса ульсь и Мордовия Республикаса алкоголизмать, наркоманиять и токсикоманиять профилактикаснон мархта сотфсь. Арьсекшневи образованиянь и образовательнай учреждениятнень управлениянь органцнон задачаснон ёткс сувафтомс иттнень мархта работать пингста восстановительнай технологиятнень эряфс ётафтомаснон, тяконь лувксса и образовательнай организациятнень эса медиациянь (мирендамань) службатнень вииямаснон.
Сембоц ванфоль кемнилие кизефкс. Тянь мархта сессиясь шумордазе эсь работанц.
Татьяна АЛЬШИНА.