Ванфтольхть тячиень шинь кизефксне

6 сентябрьста Саранскяйса Мордовия Республикань Государственнай Собранияса ётафтовсь Мордовия Республикань сисемце созывонь Государственнай Собраниять кемнилиеце сессияц.
Работасонза примасть участия Мордовия Республикань Оцюнясь А.А.Здунов, республикань Государственнай Собраниянь депутаттне, Мордовия Республикань Правительствать Председателец В.Н.Сидоров, республикань райоттнень оцюнясна, официальнай лия ломатть, массовай информациянь средствань представительхне. Вятезе сессиять Мордовия Республикань Государственнай Собраниять Председателец В.В.Чибиркин.
Шинь повесткать, конанди сувсесь кефкие кизефкс, кемокстамдонза меле, депутаттне кярьмодсть работати.
Васенце кизефкссь лемтьфоль «Мордовия Республикать территориянц лангса государственно-частнай партнёрствать, концессионнай соглашениятнень сфераснон эса башка кизефкснень ладямаснон колга» Мордовия Республикань Законть 3 статьянцты полафткснень сувафтомаснон квалма» Мордовия Республикань законть проектонцты. Тя кизефксть сессияти лихтезе Мордовия Республикань Правительствась, а корхтась колганза Мордовия Республикань Правительствать Председателенц заместителец—Мордовия Республикань энергетикань и жилищно-коммунальнай хозяйствань министрсь И.А.Чадов.
Омбоце кизефкссь лемтьфоль «Мордовия Республикаса образованиять колга» Мордовия Республикань Законти полафтксонь сувафтомать квалма» Мордовия Республикань законть проектонцты. Вал максфоль Мордовия Республикань образованиянь министрти Е.П.Солдатовати.
Валонзон коряс, тя законопроектть вельде ули кода тиемс минь закононьконь фкя лацокс федеральнайхнень мархта. Тиевихть полафткст лицензированиянь пяльксса. Госсобраниянь депутаттне примазь тя законть кафта чтенияса.
Сессияса несколька кизефкссь лемтьфоль республикань кой-кона райоттнень эса тя или тона населённай пункттнень границаснон сяда лац ладямаснонды.
Мордовия Республикань Счётнай палатать аудиторонц колга кизефксть ваномста тя вастти кочкафоль И.Н.Сафонов.
Кемнилиеце сессиять мекольце кизефксоц лемтьфоль Правительственнай частти, конань пингста Мордовия Республикань образованиянь министрсь Е.П.Солдатова пачфтсь Мордовия Республикаса образованиять виияфтоманц стратегиянц колга.
Сембе кизефкснень ваномдост меле сессиясь шумордазе эсь работанц.
Т.АЛЬШИНА.