1 декабрьста Саранскяйса, Военнай и трудовой подвигонь Мемориальнай музейса, ётафтфоль «Великай Отечественнай войнать историянц коряс тест» Международнай акциясь. Сонь аноклазе Россиянь Государственнай Думать видеса Од ломанень парламентсь странань региоттнень эса Од ломанень парламенттнень ширень кирдемаснон вельде.
Тестть тяштеманц коряс республикаса работась 250 площадка, тяконь лувксса и Мемориальнай музейса. Тяза сашендсть Саранск ошень 25№ школаса и 26№ лицейса тонафнихне.
Тестть сёрмадомдонза инголе корхтась Мордовия Республикань Государственнай Собраниянь депутатсь, республикань Од ломанень парламентть председателец Виктория Богдашкина.
— Тейнек содама историясь, ванфтома историческяй наследиясь. Тя пяк эряви тяниень пингонь Россиять условиянзон мяльса кирдезь. Ётафтови акциясь—тя аф аньцек содамошитнень проверямасна, но и сяськихнень поколенияснон колга мялямть ванфтомац,—мярьгсь сон.
Сяда тов вал максфоль Мордовия Республикань Госсобраниянь депутатти Сергей Екатерининонди, Мордовиянь Гособраниять видеса Од ломанень парламентонь членти, «Единай Россиять Од Гвардияц» региональнай штабть руководителенцты Данил Ульяновонди, «Высота» 15№ образованиянь центрать директоронц воспитандамать коряс советниконцты Олеся Пахомовати и лиятне.
Великай Отечественнай войнать историянц колга тестса ульсь 40 кизефкс. Эрть лангс максфоль несколька ответ, конатнень ёткста эрявсь кочкамс фкять—видеть.
Татьяна Альшина.