Владимир Чибиркин ульсь Краснослободскяй и Ельниковскяй райононь школатнень эса

1 сентябрьста МР-нь Государственнай Собраниять Председателец Владимир Чибиркин поздравляндазень тонафнемань од кизоть ушедоманц мархта кафта велень школатнень, конатненди Содамошинь шити тифоль капитальнай ремонт.
Социалистическяй трудонь Геройть П.М.Волковонь лемса Красноподгорнай СОШ-са, кона Краснослободскяй районца, одкстоптф классненди сувась 104 тонафни, тяконь лувксса сисепне—васенце классу.
«Тя праздниксь эсь лацонне. Сембе ошнень и велетнень эса сон пяшкотьф мазы тюсса и таколфты мяльса ялгатнень, наставникнень мархта васедемать, оцю событиянь учсемать, содамошитненди кить эзда. И минь республикасонк, и марнек странаса тиендеви лама, штоба иттне получальхть цебярь образования»,—азозе МР-нь Госсобраниять Председателец. Спикерсь азсь благодарностень валхт райононь руководствати, педагогическяй коллективти, тядятненди-алятненди и строительхненди, конат эсь пингстонза тиезь капитальнай ремонтть и аноклазь школать 1-це сентябрти. Тяка жа шиня Мордовиянь Госсобраниять Председателец ульсь Ельниковскяй райононь Стародевиченскяй СОШ-са, коса 2022 кизоня «Мордовия Республикаса образованиять виияфнемац» государственнай программать коряс капитальнайста петьф зданиясь, пяшкотьфт оборудованияса аудиториятне. Васенцеда пайгонясь тядде цингордсь тяса 57 идти, конатнень ёткса 6 шабатне састь 1-це классу.
Красноподгорнай и Стародевиченскяй СОШ-нень эса улемста торжественнай мероприятиятнень пингста Владимир Чибиркин макссь казнет педагокненди, капитальнай ремонтонь тии строительхненди, а школьнай коллектифненди казсь музыкальнай центрат.