Владимир Чибиркин ульсь Краснослободскяй районца

14 августста Краснослободскяйса ётафтфтольхть мероприятият, конат лемтьфтольхть Ошть пуроптомста 452 кизонь топодемати. Шобдаваста сявомок центральнай площадьса работасть интерактивнай творческяй зонат, коса келиста няфтьфоль национальнай ширесь, аттракциотт, ярмаркат, а обедъёткть илань участникне тертьфтольхть театрализованнай представления мархта торжественнай пяльксти.
Мордовиянь Оцюнять Артём Здуновонь, депутатскяй корпусть лемста Краснослободскяень эряйхнень поздравляндазень МР-нь Государственнай Собраниять Председателец Владимир Чибиркин.
«Краснослободскяйть историяц кемоста сотф Отчизнаньконь и республиканьконь историяснон мархта. И сембода лямбе валхне азомат сятненди, кие эсь трудонц и ратнай подвигонзон мархта виияфнесыне ошть, касфнесы тя модать козяшинц. Тяса стройсевихть эрямань од микрорайотт, петневихть-мазопневихть ульцятне и куд пирьфне, эвондакшнихть тяниень пингонь социальнай объектт»,—мярьгсь сон.
Владимир Чибиркин казезень Мордовия Республикань Государственнай Собраниять Председателенц Благодарностьса Краснослободскяень эряйхнень—трудовой коллективонь представительхнень.
Стане жа ошеряйхнень поздравляндазь Краснослободскяй райононь оцюнясь Алексей Буйнов, Краснослободскяй и Темниковскяй епископсь Климент.
Торжественнай пялькста меле Владимир Чибиркин содафтсь тематическяй площадкатнень работаснон мархта, ульсь литературнай парковкаса, корхнесь народнай умелецнень мархта. Тя шиня Государственнай Собраниять Председателец стане жа ванозе кода мольфтеви Красноподгорнай средняй общеобразовательнай школать капитальнайста петемац.