Мордовиянь Госсобраниять Председателенц кабинетса аш мезевок аф эрявикс—аньцек ся, мезсь эрявксты работамста. Владимир Чибиркин кирдезе мяльса тянь, мзярда ульсь промышленнай оцю предприятиянь руководителькс, и вов пцтай ни 12 киза региональнай парламентонь спикер. Ломанць сон пяк организованнай и аккуратнай, арьсесы эрь задачать. Мзярдовок аф максси шава надиямат. Сяс сят, кит сонь содасазь и Мордовияса, и странань лия региоттнень эса, азонкшнихть колганза аньцек шнамань валхт.
1999 кизоня «Электровыпрямитель» заводонь покодихнень эняльдемаснон коряс Владимир Чибиркин арась Госсобранияв депутатонди кандидатокс. Эста сон получась Семашковскяй избирательнай округса ширень кирдема и марса Пролетарскяй райононь эряйхнень мархта ушедсь решандакшнемост общественнай кизефкснень. Синь ётксост идень поликлиникать и Божьей Матерть Казанскяй Шкайликонц храмонц строямасна, «Луч» Культурань кудть реконструкцияц, Светотехстройста Юго-Западу вяти кить тиемац, школьнай стадиоттнень и идень налхксемань площадкатнень строямасна…
Аф кадондсыне апак ватт Краснослободскяй и Ельниковскяй райононь эряйхнень, а стане жа республикань Госсобраниянь Приёмнаи ломаттнень эняльдемаснон. Эрь кизоня спикерть лемс сашенды несколька сяда сёрма.
«Владимир Васильевич лама вийда путсь эсь ёмла родинанц касоманкса-виияманкса. Тя ломань, конань оцюфт содамошинза и опытоц руководящай вастса—ломаттнень мархта работаса, и тяни сон арась серьёзнай политикокс,—мярьгсь Федерациянь Советть сенатороц Сергей Кисляк.—Пцтай 25 киза Влади-
мир Чибиркин кочксеви республикань Госсобранияв. Тя корхтай сянь колга, што лангозонза надияйхть и кельгсазь сонь. И ули мезенкса!»
Мордовиянь Госсобраниянь Председателькс Владимир Чибиркин кочкафоль 2011 кизоня. Тяда инголе несколька киза ульсь Экономическяй политикать, предпринимательствать и собственностть коряс ко-
митетти вятикс. «Важна, што Мордовиянь Оцюнясь Артём Алексеевич Здунов, Государственнай Собраниясь, Правительствась работайхть фкя командаса. Тя канды и цебярь законотворчествати, респу-
бликать экономиканц и социальнай сферанц касоманцты-виияманцты»,—азозе Владимир Чибиркин.
Кода отмечазе Федерациянь Советть спикероц Валентина Матвиенко, Мордовиять эрь сатфксоц—тя сонь эряензон трудснон результатсна, а стане жа законодательнай и исполнительнай властень, местнай самоуправлениянь оргаттнень марстонь работасна.
«Владимир Васильевич тиендьсы семботь сянкса, штоба республикась молель инголи. Кеман, минь сяда товга карматама мольфтемонза марстонь работаньконь, штоба регионць араль нинге сяда цебярькс»,—
мярьгсь Безопасностть и коррупцияти каршек ащемать коряс Россиянь Госдумань Комитетть председателец Василий Пискарёв.
«Монь коллегазе—Владимир Васильевич Чибиркин марнек эряфонц лемдезе шачема краенцты служамати, кочкась законотворчествань оцюдонга оцю опыт. Кода Приволжьянь законодательхнень ассоциацияснон координатороц азан благодарностень валхт минь округонь эряйхнень прябаласнон ванондомаса и решандамаса участиянкса»,—азозе Нижегородскяй областень Законодательнай Со-
браниять Председателец Евгений Люлин.
И работама вастса, и эряфса Владимир Чибиркин анок кулхцондомс кизефксть и максомс лангозонза ответ, лезды лиятненди, кда тя эрявксты. «Тейнек фалу кирдема валце, кона максф кочкайхненди.
Эрь валть мельге улеза афкуксонь тев!»—корхтай эсь коллеганзонды. Сон вяти ломаттнень мархта приёмт, уленди райоттнень эса, штоба вастса корхтафтомс сянь, мезсь пичефтьсы граждаттнень.
«Владимир Васильевичень ули мялец покодемс. Перьфканза фалу ломатть, и сон мзярдовок аф кадондсыне апак ватт ломаттнень кизефксснон, прябаласнон, пеняцямаснон»,—китькстазе Мордовиянь Госсобраниянь аппаратть руководителец Елена Савинова.
21 ноябрьста Владимир Чибиркинонь ульсь юбилеец. «Мокшень правда» газетать коллективоц арьси теенза шумбраши, паваз и сатфкст ответственнай тевсонза!