Владимир Чибиркинонь Краснослободскяй районца улеманц колга

16 июньцта МР-нь Госсобраниять Председателец Владимир Чибиркин ульсь Краснослободскяй районца. Меля Сире Сендруса «Культура малой родины» федеральнай партийнай проектть коряс панжевсь Ялгакстомань куд. Эзонза кочкафт сире пингонь паршихть, конат няфнесазь 20 векть ушетксста велень эряфть. Эвондась кизефкс, кона сотф кудти коммуникациятнень ётафтомаснон мархта. МР-нь Госсобраниять Председателец надияфтсь лездомс тя прябалать решандамста, мзярда ульсь Ялгакстомань кудса.
Сядонга таколфты кизефкссь—аш Сире Сендруса Культурань кудонди здания. Ингольденнесь палсь лама кизода тяда инголе, а тяни Культурань кудсь ащи ингольдень районнай больницять площадьса. Краснослободскяй райононь оцюнять Алексей Буйновонь мархта Владимир Чибиркин содафтсь Культурань кудонь творческяй коллективть работанц мархта.
«Культурань куд тяса эряви, сон ули избирательхнень наказса»,—мярьгсь В.В.Чибиркин, азомок, што тяни эряви ваномс прябалать и арьсемс—капитальнайста петемс зданиять или строямс од.
МР-нь Госсобраниять Председателец тяфта жа ванозе эряфкшу ломаттненди и инвалиттненди Краснослободскяй кудть-интернатть стройплощадканц Пеньково посёлкаса. Комплекссь строяви 150 вастонди и сувафтови тевс 2023 кизоня.
Депутатскяй контроль ала ащи Красная Подгора велеса Социалистическяй трудонь геройть П.М.Волковонь лемса СОШ-ть капитальнайста петемац. Задачась фкя—шумордамс ремонтть тонафнемань кизоть ушедоманцты, штоба иттне сувальхть одкстоптф зданияс.
Тяка жа шиня Владимир Чибиркин примась участия торжественнай мероприятияса, кона лемтьфоль Медицинскяй работниконь шити, поздравляндазень Мордовиянь Оцюнять А.Здуновонь и Госсобраниять лемста Краснослободскяй и Ельниковскяй райоттнень эзда здравоохранениянь учреждениянь коллектифнень.
Торжественнай мероприятияса Владимир Чибиркин казезень МР-нь Госсобраниять казнеса медицинскяй работникнень и отраслянь ветераттнень и азсь лемозост лямбе валхт.