Ётафтовсь Мордовия Республикань Госсобраниять мекольце сессияц

27 декабрьста Саранскяйса ётафтовсь Мордовия Республикань сисемце созывонь Государственнай Собраниять кемгафтувоце сессияц. Эсонза примась участия МР-нь Оцюнясь Артём Здунов. Ванфоль 19 кизефкс.
Депутаттне кирдезь Батыр Эмеевонь Мордовиянь Правительствать Председателенц заместителенц должностьс путоманц ширенц. «Батыр Эмеевич сатомшка опытнай и грамотнай управленец. Работамок Дагестан Республикань Правительстваса, Россиянь Экономическяй развитиянь министерстваса, кой-кодама оцю предприятиятнень эса, няфтезе эсь прянц профессионалкс, конанди вийс коре решандакшнемс серьёзнай задачат, нолямс тевс афкуксонь производственнай проектт. Сонь пингстонза пуроптфтольхть индустриальнай паркт, конат касондыхть-вииякшнихть тячемс. Од должностьса Батыр Эмеевич кармай отвечама Мордовиять экономикас инвестициятнень водендакшнеманкса, ТОСЭР-ть и промышленнай паркнень резидентса пяшкотькшнеманкса, башка экономическяй зонать тиеманкса, предприятияньконь дополнительнай заказса пяшкотькшнеманкса. Тейнек тяни тя пяк важна. Цебярь работа!»—мярьгсь Мордовиянь Оцюнясь Артём Здунов.
«Мялезе спасибамс Артём Алексеевиченди максф довериянкса. Тонафнемок Мордовиять экономиканц, ули кода азомс, што республикать козя экономическяй, инновационнай, кадровай потенциалоц. Мордовиять стане жа ули сембоц бизнесть вятеманкса инфраструктурань тиендеманкса»,—мярьгсь Батыр Эмеев.
Правительствать Председателенц тевонзон тиендисна Игорь Фрейдин пачфтсь Мордовия Республикань Правительствать работанц результатонзон колга.
Стане жа сессиять пингста примафоль «2023 кизонди и 2024 и 2025 кизонь плановай пингти Мордовия Республикань республиканскяй бюджетть колга» Мордовия Республикань Законць. 2023 кизоня дохоттне арьсефт 53,86 миллиард цалковаень, 2024 кизоня—52,46 миллиард цалковаень, 2025 кизоня—46,11 миллиард цалковаень лувксса. Бюджетть расходнай пяльксоц водендави уликс социально значимай расходнай обязательстватнень пяшкотькшнеманкса и сон кармай 2023 кизоня 55,84 миллиард цалковай. Пцтай 33 миллиард цалковай арьсекшневи нолдамс социальнай сферати. Республикань эряйхнень эрямань условияснон цебярьгофнеманкса арьсекшневи нолдамс 702 миллион цалковай.
Бюджетнай кизефксть ваномаса примасть участия депутатскяй фракциянь и профильнай комитетонь руководительхне. Мордовиянь Оцюнясь пшкядсь пуромфненди, лятфтамок, кода примафоль ётай кизонь бюджетсь и кодама прябалат сашендовсь решандакшнемс.
«Эрьда лятфтасаськ, кода примаськ ётай кизонь бюджетть,—мярьгсь Артём Здунов.—Минь тяни аф ламода маряськ, мезсь тейнек сафтови. А тяда инголе, мезе, тейнек ашель кода касфтомс дохоттнень? Тяниень пингть аш шумоньке бизнесть инголе. А инголи несколька миллиард цалковай шумуфтолеме. Вов тяфта! Аньцек тевти малаткшнемать полафтоськ! И ломаттнень!»
Ванфтольхть и лия кизефкст. Тяфта, Мордовиянь прокурорть Сергей Лапинонь инициативанц коряс примаф «Уроз иттнень и тядянь-алянь заботафтома лятф шабатнень социальнай ширень кирдеманкса дополнительнай мератнень колга» Мордовия Республикань Законць.
Сувафтфт полафткст «Мордовия Республикаса эряй населениять башка категориянзон социальнай ширень кирдемаснон колга» Мордовия Республикань Законти. 2023 кизонь 1 январьста тевс сувафтови социальнай ширень кирдемань од мера—шабань шачфтоманкса и воспитандаманкса эрь ковонь пособия.
Стане жа киртьфоль кой-кона федеральнай закоттнень проектснон ширесна.
Сессиять шумордамста МР-нь Госсобраниять Председателец Владимир Чибиркин тись итокт парламентскяй кизоти. Стане жа депутаттненди пшкядсь Мордовиянь Оцюнясь Артём Здунов.
«Сай кизось кармай мялень салай, од задача мархта. Сембода главнайсь, штоба сембе улельхть шумбрат, штоба сяськома мархта мрдальхть сембе цёраньке. Ванфтость прянтень! Лядыксть минь обязательна сяськсаськ. Минь вии команданьке и ялгафты коллективоньке»,—мярьгсь республикань лидерсь.