26 ноябрьста Республикань Кудса ётафтовсь Мордовия Республикань сисемце созывонь Государственнай Собраниять нильгемонь колмувоце сессияц. Сонь вятезе Госсобраниять Председателец Владимир Чибиркин. Сессиять работаса примась участия Мордовиянь Оцюнясь Артём Здунов. Стане жа тясотольхть региональнай Правительствань члеттне, властень исполнительнай оргаттнень и местнай самоуправлениянь оргаттнень руководительсна, СМИ-нь представительхне.
Депутаттненди ваномс лихтьфоль 14 кизефкс.
Фкя инь важнай кизефксокс арась республикати од законодательнай инициативать—аватненди, конат шачфтозь васенце идьснон 25 кизоснон топодемс, 100 тёжянь цалковаень лувксса единовременнай пандомать омбоце чтенияса примамац.
Мордовиянь прокурорть Сергей Лапинонь инициативанц коряс сувафтф полафткс «Мордовия Республикаса физическяй культурать и спортть колга» законти. Сонь мяльс сявозь СВО-нь участникнень (нльне службаснон аделавомда меле) шабаснонды максови 50 процентонь размерса льгота спортивнай секциятнень инкса пандоманди.
«Организациятнень имуществаснон лангс налогть колга» Законти сувафтф полафткснень мяльса кирдезь келептевсь налогонь пандыхнень, конатнень лангста валхтф имуществанкса налогсь, спискасна. Тяни тя спискати сувафтовсть образованиянь и культурань сферань муниципальнай учреждениятне.
Примаф «Велень хозяйствань назначениянь модатнень оборотснон колга» Федеральнай законть 12 статьязонза полафтксонь сувафтомать колга законодательнай инициативать квалма Мордовия Республикань Госсобраниять постановленияц. Ладяф велень хозяйствань организациятнень или КФХ-тнень мархта муниципальнай собственностьса ащи модань талекатнень мимаснон порядкац. Законодательнай инициативась ули прважаф РФ-нь Государственнай Думав.
Сувафтф полафткс «Транспортнай налогть колга» Мордовия Республикань Законть 4 статьязонза. Сонь мяльса кирдезь максови ладяф ставкатнень эзда 50 процентонь размерса транспортнай налогть коряс льгота ся автомобильхнень лангс, конат сувсихть специальнай формированиятнень составс РФ-нь Вооруженнай Вийхненди автотранспортнай формирования лаца.
Сувафтфт полафткст и лия кой-кона закоттненди. Сембе кизефкснень ваномда меле сессиясь шумордазе эсь работанц.
Ольга Евдокимова.