14 сентябрьста Саранскяйса, Мордовия Республикань Государственнай Собраниять Заседаниянь залсонза, ётафтовсь Мордовия Республикань сисемце созывонь Государственнай Собраниять видеса Од ломанень общественнай палатать (Од ломанень парламентть) заседанияц, коса примась участия Мордовия Республикань Государственнай Собраниять Председателенц заместителец Сергей Вдовин.
Сергей Михайловичень валонзон коряс, тячиень шинь повесткась козя. Ваномац кармай салсема мяль, сяс мес кизонда примафоль участия республиканскяй и межрегиональнай форупнень, фестивальхнень, гражданско-патриотическяй акциятнень и проекттнень эса. Сяс и ули надияма, што ся законопроекттнень, инициативатнень, конат вановихть сёксень сессияста, пачфтевихть песнонды.
Вятезе заседаниять Од ломанень парламентть Председателец Виктория Богдашкина. Шинь повесткать кемокстамдонза меле кярьмотьфоль работати.
Васенце кизефкссь лемтьфоль Од ломанень общественнай палатать (Од ломанень парламентть) Мордовия Республикаса «Движение Первых» идень и од ломанень Российскяй движениять ёткса соглашениять кемокстаманцты. Соглашениять алу кядьснон путозь Виктория Богдашкина и Иттнень и од ломаттнень Общероссийскяй общественно-государственнай движенияснон Региональнай отделениянц Советонц председателец Дарья Радайкина.
Сяда тов пачфтьфоль кода Од ломанень общественнай палатать членонза примасть участия тяддень июльста Самараса ётафтф ПФО-ть «iВолга» Од ломанень образовательнай форумсонза. Од ломанень общественнай палатать Председателенц заместителенц Сергей Терёшкинонь информацияц шарфтсь эсь лангозонза оцю мяль.
Шинь повесткати сувафтфтольхть и лия кизефкст. Ётксост «Своих не бросаем» творческяй работатнень республиканскяй конкурсснон, Од ломанень муниципальнай парламенттнень (Мордовиянь Большеберезниковскяй и Лямбирскяй муниципальнай райоттнень кепотьксснон лангса) деятельностьснон тяда ингольдень итогснон, Од ломанень общественнай палатать членонзон ПФО-нь региоттнень Велень од ломаттнень слётсост участиянь примамснон колга и лия кизефксне.
Татьяна Альшина.