14 декабрьста Саранскяйса, Мордовия Республикань Государственнай Собранияса, ётафтовсть колма кизонди республиканскяй бюджетть колга законопроектть коряс публичнай слушаният.
Вятезе пуромксть Мордовия Республикань Государственнай Собраниять Председателенц заместителец Сергей Вдовин. Залу пуромфнень ёткса ульсть Государственнай Собраниянь депутатт, республикань Правительствань члетт, политическяй партиянь и общественнай организациянь представительхть и лият.
Сергей Вдовинонь валонзон коряс, «2024 кизонди и 2025 и 2026 кизотнень плановай периодснонды Мордовия Республикань республиканскяй бюджетть колга» законопроектть коряс публичнай слушаниятне ётафтовихть очнай форматса. А бюджетти инь оцю пяльксокс ащи социальнай сембе обязательстватнень пяшкодемасна, тяконь лувксса идь мархта семьятнень ширень кирдемасна, пособиятнень, трудонкса пандомать инь ёмла размеронц индексациясна. Максома сембе ширдень лезкс специальнай военнай операциянь участникненди и ветераттненди, синь семьянь членцнонды.
Мордовия Республикань экономикань, торговлянь и предпринимательствань министрть тевонзон тиендисна Иван Горин пачфтсь пуромфненди Мордовиять 2024-2026 кизотненди социально-экономическяйста касомань-вииямань уликс прогнозонзон колга. Башка мяль шарфтсь производстваса и социальнай тефнень эса учсеви результаттнень лангс.
Сяда тов вал максфоль Мордовия Республикань финансонь министрти Сергей Тюркинонди. Эсь выступлениясонза сон азозе, што бюджетсь, кода и инголи, кемоста сотф социальнай ширеть мархта. Сай кизоть лама средства нолдави здравоохраненияти, социальнай политикати. 2024 кизоня дохоттнень объёмсна ули 59,6, расхоттнень—59,9 миллиард цалковай.
Публичнай слушаниятнень пингста Сергей Тюркинонди и Иван Горинонди максфтольхть кизефкст.
Татьяна Альшина.