9 ноябрьста Мордовия Республикань Государственнай Собранияса ётафтовсь «Православиясь и отечественнай культурась» лем ала XXXII-це Международнай Роштувань лувоматнень региональнай этапсна. Эсост примасть участия республикань Государственнай Собраниянь депутаттне, Од ломанень парламентонь члетт, православнай духовенствань представительхть, вузонь, колледжень и школань преподавательхть, студентт.
Мордовия Республикань Государственнай Собраниять Председателенц Владимир Чибиркинонь лемста лувоматнень панжезень и пуромфнень приветствовандазень сонь заместителец Наталья Долматова.
—Роштувань лувоматне пуропнесазь марс научнай сообществать и общественнай организациятнень, Од ломанень парламентонь члеттнень, учительхнень и студентнень. Синь ётафнемасна Мордовияса арась пара койкс. Оцю мяль тянь лангс шарфни Мордовия Республикань Оцюнясь Артём Здунов. Роштувань лувоматне—тя стама кепотькс, кона няфнесы, кода эряви работамс марса властень оргаттненди, обществати и Рузонь православнай церькавти сай пингонь поколениять афкуксонь ломанькс касфтомста. Тя пяк эряви тячи, мзярда Россиясь тюри Западть мархта эсь духовнай и куломань аф содай козяшинзон ванфтоманкса. Россиять виец—минь марстоньшисонк и историческяй мялямсонк. Тяфта ульсь и тяфта кармай фалу,—мярьгсь Наталья Долматова.
—Тячиень лувоматнень эса кепотьф пяк эрявикс тема,—мярьгсь пуромфненди Саранскяй и Мордовскяй митрополитсь Зиновий.—Нинге кунара Православиясь славянскяй аф фкя лацонь племенатнень тиезень фкя народкс, пуроптозе марс Русьть. Христианствать ломаттнень эряфс вихцода сувафтомс ашель кода, но Шкайти верась-кемамась курокста вятезень синь Шкаень кельгомати и видешити. И Православиянь духовнай козяшитнень вельде тифоль-пуроптфоль Российскяй виидонга вии государствась!
Сяда тов Роштувань лувоматнень эса доклатт тисть республикань и странань лия региононь учёнайхне. Нят: С.А.Есенинонь лемса Рязанскяй государственнай университетонь философиянь кафедрань заведующайсь, философскяй наукань докторсь, профессорсь Рудольф Подоль, И.Д.Воронинонь лемса республиканскяй краеведческяй музейть директороц, филологическяй наукань кандидатсь Дмитрий Фролов и лиятне.
Владимир Нестеров.