Аф нолдамс зиян

1 ноябрьста Республикань Кудса Мордовиянь Оцюнять Артём Здуновонь председательстванц ала ётафтовсь Мордовия Республикань Антитеррористическяй комиссиять и Мордовия Республикаса Оперативнай штабть марстонь заседаниясна. Ванфтольхть ноябрьскяй илатнень пингста зиянонь аф нолдамань кизефксне, а стане жа мератне, конат водендафт промышленностень, топливно-энергетическяй, атомнай и транспортнай комплексонь, здравоохранениянь, образованиянь объекттнень и лама ломанень пуропни васттнень эса безопасностть виияфнеманцты.
Заседаниять панжемста Мордовиянь Оцюнясь Артём Здунов лятфтазе, што исполнительнай властень и местнай самоуправлениянь оргаттнень инголе ащи задача — максомс оценка подведомственнай объекттнень антитеррористическяй аралафшиснонды, примамс мерат видеонаблюдениянь инженерно-техническяй системаса козякофтомаснон, эвакуациять мархта управлениять коряс.
«Эряви максомс оценка объекттнень физическяй анокшиснонды, а стане жа сянди, анок-аф персоналсь диверсиянь и террористическяй актонь эвондамань пельксти. Фалу ваномс безопасностень системать ладямаса афсатыкснень машфнемаснон мельге. Тяниень обстановкаса башка мяль эряви шарфтомс энергетикань, транспортонь объекттнень лангс»,—китькстазе МР-нь АТК-ть Председателец.
Дополнительнай мератнень колга пачфтсть Энергетикань и ЖКХ-нь министерствань, Росгвардиянь управлениянь, Промышленностень, наукань и од технологиянь министерствань, Транспортть и дорожнай хозяйствать коряс Госкомитетонь, Здравоохранениянь министерствань, Образованиянь министерствань, Саранск ошень округонь руководительхне.
Артём Здунов макссь поручения азф пингста ётафтомс проверкат безопасностень инженерно-техническяй систематнень работамшкаснонды и диверсиянь и террористическяй актонь пельксть эвондамста персоналть анокшинцты, а стане жа анокламс и ётафтомс эряфс компенсирующай мероприятият.
Корхтамок ноябрьскяй илатнень пингста зиянонь аф нолдамать колга, Мордовия Республикать эзга МВД-нь министрть заместителец—полициянь начальниксь Игорь Брежнев пачфтезе, што силовой ведомствань сотрудникне путф задачатнень пяшкотькшнемаснонды анокт. Маластонь шитнень Общественнай порядкать ванфтоманцты ули водендаф внутренняй тевонь органонь и Росгвардиянь Управлениянь сатомшка лама сотрудник.
«Илань шитнень минь тинь мархтонт задачаньке—тиемс семботь ломаттнень безопасностьснон обеспечендаманкса. Башка мяль эряви шарфтомс мероприятиятнень ётафтомста зиянонь аф нолдамати»,—китькстазе МР-нь АТК-ть Председателец Артём Здунов.
Стане жа АТК-ть заседанияса ванфоль, кода исполнительнай властень и местнай самоуправлениянь оргаттнень мархта пяшкотькшневихть Мордовия Республикань Антитеррористическяй комиссиять решениянза.