2 сентябрьста Артём Здунов ётафтозе республикань экономикать кемошинц и ширень кирдеманц коряс антикризиснай штабть заседаниянц. Мордовиянь Оцюнясь кулхцондозень регионца уликс ситуациять колга профильнай министерстватнень руководительснон докладснон.
Республикань руководительсь азозе, што мекольдень решениятне, конат примафт федеральнай центрать мархта, видеста токсесазь Мордовиять, а сяда пяк Саранск ошень округть. Аварийнай эряма вастста ломаттнень ётафтомаснон коряс работать виияфтоманкса нолдави од программа, кона вихонзафтсы ся куттнень калафнемаснон или реконструкцияснон, конат аф кондястихть эрямс мекольдень вете кизотнень.
«Программась мярьгонди минь ломаненьконди сяда курокста ётамс цебярь эряма вастс. Тяда башка, Национальнай благосостояниянь фондста нолдави 120 миллиард цалковай оцю проекттненди—промышленнай объектонь, ки лангонь инфраструктурань строяманди. Тейнек эряви примамс участия тя проекттнень эса»,—мярьгсь Артём Здунов.
Мордовиянь Экономикань министерствать даннаензон коряс, сяда тов кирдеви МСП-нь субъекттнень ширесна государствать ширде.
Тяда башка, кода азозе министрть аф лама пингс тевонзон тиендисна Иван Горин, республикань предпринимательствань ширень кирдемань Фондсь ётафты «Бизнес-десант» акция, кона работай МСП-нь субъекттнень мархта райоттнень территорияса, азондомок ширень кирдемань мератнень колга. 6 райоттнень эса ни примасть участия акцияса, 28 октябрти молемс «Бизнес-десантсь» моли сембе райоттненди.
Азфоль, што Мордовиянь предпринимательхненди 19 сентябрьста ётафтови «Развитие е-com» конференция, конань пингста, тяконь лувксса онлайн, ётафтови предпринимательхнень и эсь прянь заняйхнень маркетплейснень эса тонафтомасна.
МР-нь промышленностень, наукань и од технологиянь министрсь Игорь Губайдуллин азондсь республиканскяй предприятиятнень мощностьснон колга. Региононь предприятиятнень мархта нолдаф промышленнай продукциянь объёмтне лувондовихть 120 миллиард цалковайса, миф—115 миллиард цалковаень питнес.
Мордовиянь строительствань и архитектурань министрсь Алексей Гришакин азондсь ипотечнай кредитованиянь сфераса тефнень колга. Августста сявфоль 269 тяфтама кредит. Тяни няеви тя тевть лангс мялень шарфтомань кирьфтамась, но сентябрьста ни учсеви ипотечнай кредитонь сявомать касомац.