15 сентябрьста Республикань Кудса ётафтовсь МР-нь экономикать ширенц кирдеманц и кемошинц ванфтоманц коряс антикризиснай штабть заседанияц, конань эса ванондозь главнай отраслятнень ширеснон кирдемаснон коряс уликс и од мератнень.
Мордовиянь Экономикань министерствать даннаензон коряс, няеви льготнай кредитонь получаманкса заявкань максомань лувксть касомац.
Промышленностьса курок кармай работама ширень кирдемань од механизма—промышленнай ипотекась. Тя лезды бизнести получамс лама пингонь льготнай кредитт производственнай недвижимостень рамаманди, од помещениянди карьхцнень кирьфтамаснонды. Промышленнай ипотекати участникнень кочкамасна ушедови тяддень нилеце кварталста. Мордовиянь велень хозяйствань и продовольствиянь министрсь Александр Кечайкин азондсь зерновой культурань касфнихнень ширень кирдемаснон колга, тяконь лувксса регионти РФ-нь резервнай фондста нолдаф нинге 128 миллион цалковай. Мордовиянь аграрийхнень, конат заняфт сёронь касфтомаса, ширень кирдеманкса тядде нолдаф 552 миллион цалковай.
Тяфта жа штабть заседанияса ванондозь трудонь рынкаса тефнень, тя сфераса стакатнень-сталмотнень валхтомаснон коряс дополнительнай мероприятиятнень эряфс ётафтомаснон. Тяконь лувксса корхтамась мольфтевсь аф сембе пингонь рабочай вастонь пуроптомать, предприятиянь работникнень, конат повихть работаста кирьфтамати, одукс тонафтомать колга.
Кода азондсь МР-нь социальнай араламань, трудонь и населениять занятостенц коряс министрсь Игорь Князьков, штоба ванфтомс трудонь рынкаса стабильнайста тефнень мольфтемаснон, эряви нолямс тевс «Демография» нацпроектть «Содействие занятости» федеральнай проектть рамкаса одукс тонафнемать. Республикаса 977 ломанць ушедсть тонафнема питнефтома ня программатнень коряс.
Мордовиянь Оцюнясь башка лоткась экономикань отраслятнень эса сембе пингть тефнень мольфтемаснон мельге ваномать лангс, штоба ситуациять полафтомста сяда курокста сувафтомс полафткст.